Cənub bölgəsində soyqırımı qurbanlarının xatirəsi anılıb
Astara-Lerik-Masallı, 31 mart, Bağır Əliyev, AZƏRTAC
Martın 31-də Astara Rayon Mərkəzi Kitabxanasında Azərbaycanlıların Soyqırımı Gününə həsr olunmuş ümumrayon tədbiri keçirilib.
AZƏRTAC xəbər verir ki, toplantıda soyqırımı qurbanların xatirəsi bir dəqiqəlik sükutla yad edilib.
Tədbirdə çıxış edən Astara Rayon İcra Hakimiyyəti başçısının müavini Yasəmən Rəsulova erməni millətçilərinin 1918-ci ilin mart-aprel aylarında azərbaycanlılara qarşı törətdikləri soyqırımından danışıb. Bildirilib ki, 1918-ci il mart soyqırımından 98 il keçsə də, erməni millətçilərinin törətdikləri bu dəhşətləri unutmaq qeyri-mümkündür. Erməni terroru təkcə 1918-ci il mart soyqırımı ilə məhdudlaşmır. Əsrin sonunda 1 milyona yaxın soydaşımız doğma torpaqlarından didərgin salınıb, kəndlər, şəhərlər, nadir tarixi abidələr yandırılaraq dağıdılıb, evlər talan edilib, minlərlə insan qətlə yetirilib, girov götürülüb və itkin düşüb.
Çıxışlarda erməni millətçilərinin təkcə ötən əsrin əvvəlində deyil, tarix boyu xalqımıza qarşı işğalçılıq siyasəti yürütdüyü, xarici havadarlarının dəstəyi ilə tarixin ayrı-ayrı dövrlərində azərbaycanlılara qarşı soyqırımları törətdikləri diqqətə çatdırılıb.
X X X
Azərbaycanlıların Soyqırımı Günü Lerikdə də qeyd olunub.
Bu münasibətlə keçirilən tədbirdə çıxış edən rayon icra hakimiyyətinin başçısı Rövşən Bağırov bildirib ki, 1918-ci ilin mart qırğınlarına ilk siyasi hüquqi qiymət xalqımızın ümummilli lideri Heydər Əliyev tərəfindən verilib. Azərbaycan Prezidentinin və Heydər Əliyev Fondunun dünyanın aparıcı dövlətlərində xalqımızın başına gətirilmiş soyqırımı aktlarının tanıdılması istiqamətində gördüyü işlər öz bəhrəsini verməkdədir.
Çıxış edən rayon icra hakimiyyəti başçısının müavini Habil Məlikov, texniki peşə məktəbinin direktoru Hüseynbala Əliyev, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Fəxrəddin Mirzəliyev və başqaları uzun illər erməni qəsbkarları tərəfindən xalqımıza qarşı törədilmiş soyqırımı aktlarını pisləyərək, Prezident İlham Əliyevin həyata keçirdiyi məqsədyönlü siyasətdən danışıb, Heydər Əliyev Fondunun vitse-prezidenti Leyla xanım Əliyevanın təşəbbüsü ilə reallaşdırılan “Xocalıya ədalət!” kampaniyası çərçivəsində görülən işləri diqqətə çatdırıblar.
X X X
Masallı şəhərindəki Qəhrəmanlar Parkında soyqırımı qurbanlarının xatirəsi dərin hüznlə yad edilib.
AZƏRTAC xəbər verir ki, rayonun rəhbər işçiləri, müharibə veteranları, ağsaqqallar, ziyalılar, məktəblilər və minlərlə rayon sakini qəhrəmanların xatirəsinə ucaldılmış abidə önünə gül dəstələri düzüblər.
Anım mərasimi Masallı şəhərindəki Heydər Əliyev Mərkəzində Azərbaycanlıların Soyqırımı Gününə həsr olunmuş elmi-praktiki konfransla davam etdirilib.
Tədbirdə çıxış edən Masallı Rayon İcra Hakimiyyətinin başçısı Rafil Hüseynov bildirib ki, xalqımız iki əsrdir mənfur erməni xisləti ilə üz-üzə qalıb. Erməni millətçiləri azərbaycanlılara qarşı kütləvi qırğınlar törətməklə “böyük Ermənistan” yaratmaq xülyasına düşsələr də, onlar istəklərini reallaşdıra bilməyiblər.
Anım mərasimində Yeddioymaq kənd orta məktəbinin müəllimi Azər Eyvazov azərbaycanlıların soyqırımı ilə bağlı məruzə edib.
Məruzəçi bildirib ki, azərbaycanlılara qarşı əsrlərlə davam edən soyqırımı nəticəsində yüzlərlə yaşayış məntəqəsi yerlə-yeksan edilib, minlərlə soydaşımız qəddarlıqla qətlə yetirilib. Ermənilər 1905-1906-cı illərdə İrəvan və Gəncə quberniyalarının 200, Şuşa, Cəbrayıl və Zəngəzurun 75 azərbaycanlı kəndini talan ediblər.
1918-ci ilin mart-aprel aylarında isə azərbaycanlıların soyqırımı xüsusi qəddarlıqla Bakı, Şamaxı, Quba, Qarabağ, Zəngəzur, Naxçıvan, Lənkəran və digər ərazilərdə həyata keçirilib.
Diqqətə çatdırılıb ki, 1918-ci ilin mart-aprel aylarında Bakı, Şamaxı, Quba, Muğan və Lənkəranda ermənilər 30 mindən çox azərbaycanlını qətlə yetirib, 10 minlərlə insan öz torpaqlarından didərgin düşüb.
Elmi-praktik konfransda Uşaq və Yeniyetmələr Yaradıcılıq Evinin direktoru Əsmər Axundova, Qarabağ Müharibəsi Əlilləri, Veteranları və Şəhid Ailələri İctimai Birliyinin rayon təşkilatının sədri Nahid Rəhimov, Masallı Dövlət Regional Kollecinin tələbəsi Turə Abuşova və başqaları çıxış edərək, erməni vandallarının cənub bölgəsində törətdiyi vəhşiliklərdən danışıblar.
Bölmənin digər xəbərləri
