CƏNUBİ AFRİKA RESPUBLİKASINDA MARQARET TETÇERİN OĞLU HƏBS EDİLMİŞDİR
AZƏRTAC Röyter agentliyinə istinadla xəbər verir ki, Böyük Britaniyanın keçmiş Baş naziri Marqaret Tetçerin oğlu Cənubi Afrika Respublikasında həbs olunmuşdur. Mark Tetçer dostu - Britaniyanın xüsusi təyinatlı SAS qrupunun keçmiş hərbi qulluqçusu Saymon Mannla birlikdə Ekvatorial Qvineyanın Prezidenti Obianq Nqema Mbasoqonu hakimiyyətdən devirmək üçün 200 min ingilis funtuna 70 əcnəbi muzdlu tutmaqda təqsirləndirilir. Həmin şəxslərin arasında Ermənistanın altı vətəndaşı da var.
Onların həbs edildiyini CAR-ın “Scorpions” xüsusi xidmət idarəsinin nümayəndəsi də təsdiqləmişdir. CAR polisinin məlumatına görə, tanınmış biznesmen Mark Tetçer bir müddət Keyptaunda yaşamışdır. Onun zəngin neft ehtiyatlarına malik Ekvatorial Qvineyada hərbi çevrilişdə əli olan şübhəli şəxs kimi tezliklə məhkəmə qarşısında çavab verəcəyi gözlənilir.
