Cənubi Koreya və Almaniya hərbi pakt imzalayacaq
Pekin, 22 may, AZƏRTAC
Cənubi Koreya və Almaniya müdafiə sənayesində tədarük zəncirini gücləndirməyə kömək etməkdən ötrü hərbi sirləri qorumaq barədə razılaşmanı ən qısa zamanda hazırlamaq məsələsində razılığa gəliblər.
AZƏRTAC Yonhap agentliyinə istinadla xəbər verir ki, bu barədə razılaşma Almaniya Kansleri Olaf Şoltsun mayın 21-də Cənubi Koreyaya birgünlük səfəri zamanı Prezident Yun Sok Yol ilə görüşdə əldə olunub.
Görüşdən sonra keçirilən mətbuat konfransında Prezident Yun Sok Yol deyib: “Biz razılaşdıq ki, iki ölkənin müdafiə və silahlar sahəsində əməkdaşlığının genişləndirilməsi vacibdir”.
Tərəflərin, həmçinin hidrogen, yarımkeçiricilər, bio və yaşıl enerji kimi qabaqcıl sənaye sahələri üzrə güclü ticarət və investisiya əlaqələrini genişləndirmək barədə razılığa gəldiyini deyən Cənubi Koreya lideri əlavə edib ki, dünya iqtisadiyyatdakı qeyri-sabitlik, geosiyasi münaqişələr, qlobal tədarük zəncirinin yenilənməsi ilə üz-üzə olarkən, Seul və Berlin tədarük zənciri üzrə əməkdaşlığı dərinləşdirəcək.
Qeyd edək ki, bu, Almaniya kanslerinin son 30 ildə Cənubi Koreyaya ilk rəsmi səfəridir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
