Çexiyada Azərbaycan səfirinin diplomatik fəaliyyətinin başa çatması ilə əlaqədar ziyafət təşkil edilmişdir
Bakı, 18 iyun (AZƏRTAC). Çex Respublikası parlamentinin Deputatlar Palatasının sədri Yan Hamaçek Azərbaycanın bu ölkədəki səfiri Tahir Tağızadənin diplomatik fəaliyyətinin başa çatması ilə əlaqədar iqamətgahında ziyafət təşkil etmişdir.
Səfirlikdən AZƏRTAC-a verilən məlumata görə, tədbirdə Deputatlar Palatasının sədr müavini Voytex Filip, Avropa Şurası Parlament Assambleyasında daimi nümayəndə heyətinin rəhbəri, Avropa məsələləri üzrə komitənin sədr müavini Dana Vahalova, Palatanın üzvü Rom Kostrjitsa, Senatın xarici işlər, müdafiə və təhlükəsizlik komitəsinin sədr müavini Tomaş Yirsa, senator Həsən Mezian, Çexiyanın keçmiş baş naziri Mirek Topolanek, sabiq xarici işlər naziri Yan Kohout və başqaları iştirak etmişlər.
Qeyd edək ki, hər hansı bir xarici ölkənin səfirinin diplomatik fəaliyyətinin başa çatması ilə əlaqədar ziyafət verilməsi Deputatlar Palatasının tarixində ilk hadisədir.
Ziyafətdə Çexiya və Azərbaycan arasında münasibətlərin uğurla inkişaf etdiyi, hər iki ölkənin dövlət başçılarının, eləcə də parlament nümayəndələrinin səfərlərinin əlaqələrin inkişafına töhfə verdiyi, tərəflər arasında mövcud strateji müttəfiqlik əlaqələrinin gələcəkdə daha da möhkəmlənəcəyinə əminlik ifadə olunmuşdur.
Bölmənin digər xəbərləri
