Çexiyada keçirilmiş beynəlxalq konfransda Azərbaycanda gənclərə göstərilən diqqət və qayğıdan danışılmışdır
Bakı, 14 iyun (AZƏRTAC). Azərbaycan Respublikasının insan hüquqları üzrə müvəkkili (Ombudsman) Elmira Süleymanova iyunun 11-13-də Çex Respublikasının paytaxtı Praqa şəhərində “Əhali və inkişaf üzrə dialoq: Şərqi Avropa və Mərkəzi Asiyanın inkişafı naminə insan kapitalının qurulması” mövzusunda beynəlxalq konfransda iştirak etmişdir.
Ombudsman Aparatından AZƏRTAC-a bildirilmişdir ki, nazirlərin, digər yüksək səviyyəli rəsmilərin və region üzrə ekspertlərin iştirak etdikləri konfrans BMT-nin Əhali Fondunun (UNFPA) təşkilatçılığı və Çexiya Xarici İşlər Nazirliyinin dəstəyi ilə keçirilmişdir.
Konfransın məqsədi mövcud demoqrafik dəyişikliklərin regionda cəmiyyətə çatdırılmasının genişləndirilməsinə yönəlmiş təşəbbüslərin inkişafı üçün məsul rəsmilər və ekspertlər arasında dialoqun başlanmasının təmin edilməsi, eyni zamanda, Əhali və İnkişaf Məsələləri üzrə Qahirə Konfransının fəaliyyət proqramının, digər mühüm beynəlxalq sənədlər və alətlərin əsas prinsiplərini əks etdirən milli siyasətə əsaslanaraq ən optimal təsir yollarının araşdırılması olmuşdur.
Ölkələrarası əməkdaşlıq vasitəsilə inklüziv, innovativ və praqmatik regional prosesin başlanmasına təkan verən beynəlxalq tədbirdə iştirakçı dövlətlər bu istiqamətdə əldə etdikləri nəticələri diqqətə çatdırmış, yeniyetmə və gənclər, ailə, gender bərabərliyi və doğum əmsalı məsələləri üzrə müzakirələr aparmışlar.
Konfrans öz işini “İnsan potensialının inkişafı sayəsində artımın idarə olunması”, “Əhali sayının dinamikası və inkişaf sahəsində gələcək perspektivlər” və s. plenar iclaslar üzrə davam etdirmişdir.
Elmira Süleymanova “Gənclərə investisiya inkişaf məqsədlərinə nail olmağın açarıdır” mövzusunda plenar iclasda çıxış edərək demişdir ki, Azərbaycan Respublikası Prezidentinin müvafiq Sərəncamı ilə təsdiq edilmiş “Azərbaycan Gəncliyi Dövlət Proqramının (2005-2009-cu illər)” icrası nəticəsində gənclərin vətənpərvərlik tərbiyəsi sahəsində davamlı iş aparılmış, istedadlı və yaradıcı gənclərə dövlət qayğısı artırılmışdır. Məşğulluq sahəsində beynəlxalq təcrübəyə və gənclərin təşəbbüskarlığına əsaslanan fəaliyyətlər inkişaf etdirilmiş, regionlarda yaşayan gənclərin fəallığını stimullaşdıran tədbirlər həyata keçirilmişdir. Ölkənin ictimai-siyasi həyatında gənclərin yaxından iştirakı üçün lazımi şərait yaradılmış və bu sahədə irəliləyişlərə nail olunmuşdur. Gənclər təşkilatlarının hüquqları genişləndirilmiş, onların layihə və proqramlarına mütəmadi dəstək verilmişdir. Gənclər beynəlxalq əməkdaşlıq sahəsində təşəbbüskarlıq və davamlı fəaliyyət nümayiş etdirmişlər.
Bildirilmişdir ki, gəncliyin inkişafında növbəti mərhələnin təmin edilməsi məqsədilə “Azərbaycan gəncliyi 2011-2015-ci illərdə” Dövlət Proqramının həyata keçirilməsi zərurəti yaranmış və Proqram Azərbaycan Respublikası Prezidentinin 2011-ci il 7 iyul tarixli Sərəncamı ilə təsdiq edilmişdir. Qeyd olunmuşdur ki, ölkəmizdə inkişaf siyasətinin əsas strateji hədəflərini özündə ehtiva edən “Azərbaycan 2020: gələcəyə baxış” İnkişaf Konsepsiyası çərçivəsində hazırlanaraq həyata keçirilməsi nəzərdə tutulmuş müvafiq dövlət proqramlarının gerçəkləşdirilməsi çoxşaxəli, səmərəli və innovasiya yönümlü iqtisadiyyatın formalaşdırılmasına, sosial sahədə önləyici inkişafın təmin olunmasına və əhalinin rifahının yüksək səviyyəyə çatdırılmasına, habelə ictimai həyatın bütün istiqamətlərində yeni nailiyyətlərin əldə olunmasına, ümumilikdə insan hüquqlarının və azadlıqlarının daha səmərəli təmininə və etibarlı müdafiəsinə xidmət edəcəkdir. Ombudsman vurğulamışdır ki, ölkə Prezidentinin 2011-ci il 27 dekabr tarixli Sərəncamı ilə təsdiq edilmiş Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramında nəzərdə tutulmuş tədbirlərin icrası da böyük əhəmiyyət daşıyır. Müvəkkilin əhalinin müxtəlif qruplarının, o cümlədən uşaq və gənclərin hüquqlarının səmərəli təmin edilməsi ilə bağlı təkliflərinin nəzərə alınması insan hüquqlarının təmin olunmasının və etibarlı müdafiəsinin səmərəsinin artırılmasına xidmət etmişdir.
Azərbaycan Ombudsmanının gənclərlə bağlı bir çox tövsiyələri diqqətə çatdırılmışdır. Nikaha daxil olan vətəndaşların tibbi, tibbi-genetik müayinə və məsləhət almaq hüququnun təmin edilməsi, gənclər üçün anonim fəaliyyət göstərən genetik məsləhətxanaların təşkili, vətəndaşların, xüsusilə yetkinlik yaşına çatmayanların reproduktiv sağlamlıq, cinsi tərbiyə və ailə planlaşdırılması sahəsində biliklərinin artırılması, milli xüsusiyyətlərimizə uyğun olaraq ölkədə yayılması, habelə erkən nikahlar, selektiv abortların aradan qaldırılması məqsədilə beynəlxalq təcrübənin öyrənilməsi, bu sahədə maarifləndirmə tədbirlərinin, treninq-seminarların keçirilməsi, hüquqi nəşrlərin və televiziya proqramlarının hazırlanması bu qəbildəndir.
Ombudsman E. Süleymanovanın çıxışı konfrans iştirakçıları tərəfindən maraqla dinlənilmişdir.
Bölmənin digər xəbərləri
