Çili koronavirus əleyhinə kütləvi peyvəndə başlayır
Madrid, 29 yanvar, AZƏRTAC
Çili növbəti çərşənbə günündən başlayacaq COVID-19 əleyhinə kütləvi peyvənd planına start verəcəyini açıqlayıb.
AZƏRTAC xəbər verir ki, Çiliyə təxminən iki milyon dozalıq Sinovac Çin vaksini gətirilib.
Səhiyyə Nazirliyinin məlumatlarına görə, bu, fevralın 12-dək yaşı 71-dən yuxarı olan vətəndaşları: tibb işçilərini, hərbçiləri vaksinlərin ilkin dozası ilə immunlaşdırmağa imkan yaradacaq. İkinci doza 28 gün sonra tətbiq olunacaq.
Çilidə ilk peyvəndlər 25 dekabr 2020-ci il tarixində Şimali Amerikanın Pfizer vaksini ilə edilib. Həmin peyvəndlər, ilk növbədə, intensiv terapiya şöbəsində çalışan işçilərə vurulub.
İctimai Səhiyyə İnstitutu (ISP) tərəfindən təsdiqlənmiş Sinovac laboratoriyasında hazırlanan Sinovac Çin vaksini kütləvi vaksinləməyə başlamağa imkan verəcək.
Çili təxminən 10 milyon doza Pfizer-BioNTech vaksininin, 10 milyon doza Sinovac vaksininin, 30 milyon doza AstraZeneca-Oxford vaksininin alınması üçün müqavilələr imzalayıb.
Hökumət 2021-ci ilin birinci rübü ərzində prioritet qrupuna daxil olanları (təxminən beş milyon nəfər), ilin birinci yarısının sonunadək isə əhalinin 80 faizini (təxminən 15 milyon nəfər) peyvənd etməyə çalışır.
Çili Səhiyyə Nazirliyinin məlumatlarına görə, ölkədə 714 min 143 nəfər koronavirus infeksiyasına yoluxub, 18 min 174 nəfər isə bu xəstəlikdən vəfat edib.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
