Çilili senator Azərbaycanın suverenliyinə qarşı törədilmiş zorakılıq aktını qınayıb
Bakı, 20 iyul, AZƏRTAC
Çili senatında Çili-Azərbaycan Parlamentlərarası Dostluq Qrupunun sədri, senator Fransisko Çauan Azərbaycanın suverenliyinə qarşı törədilmiş zorakılıq aktını qınayıb.
AZƏRTAC xəbər verir ki, Fransisko Çauan Azərbaycanın bu ölkədəki səfirinə müraciət edərək, iyulun 12-də Tovuz rayonunda ölkəmizin suverenliyinə qarşı törədilən və Azərbaycanın hərbi və mülki vətəndaşlarının həyatına son qoyan silahlı hücum barədə xəbəri dərin narahatlıqla qarşıladığını bildirib.
F.Çauan regional təhlükəsizliyə təsir edən və beynəlxalq hüquqa açıq şəkildə zidd olan bu zorakılıq aktlarının təəssüf doğurduğunu bildirib. 30 ildən çoxdur ki, milli suverenliyinə qarşı ərazilərinin qeyri-qanuni işğalı və təəssüf ki, insanlarının həyatını itirməsi ilə nəticələnmiş davamlı silahlı təcavüzlərdən əziyyət çəkən Azərbaycan hökuməti və xalqı ilə həmrəy olduğunu ifadə edib.
O, eyni zamanda Ermənistanı və Azərbaycanı bu münaqişəni BMT-nin Təhlükəsizlik Şurasının Azərbaycan Respublikasının suverenliyinə və ərazi bütövlüyünə, beynəlxalq tanınmış sərhədlərinin toxunulmazlığına hörməti təsdiq edən 1993-cü il 822, 853, 874 və 884 saylı qətnamələri əsasında həll etməyə çağırıb, planetin bu regionunda sülh, təhlükəsizlik və insan ləyaqətinə hörmətin üstünlük qazanacağı ümidi ilə Çili Senatının Çili-Azərbaycan Parlamentlərarası Qrupunun dəstəyini bildirib.
Bölmənin digər xəbərləri
