Çin ali qanunverici orqanının illik sessiyası başlayıb
Pekin, 5 mart, AZƏRTAC
Çinin ali qanunverici orqanı olan Çin Xalq Nümayəndələri Yığıncağının illik sessiyası işə başlayıb.
AZƏRTAC xəbər verir ki, açılış mərasimində Çin Xalq Respublikasının (ÇXR) Sədri Si Cinpin və ölkənin digər rəhbər şəxsləri iştirak ediblər. Çinin müxtəlif bölgələrindən təxminən 3 min nümayəndənin qatıldığı sessiyada Dövlət Şurasının sədri (Baş nazir) Li Keçyan hökumətin hesabatını təqdim edib.
Martın 13-dək davam edəcək 14-cü çağırış Çin Xalq Nümayəndələri Yığıncağının ilk sessiyasında ölkə həyatının müxtəlif sahələrinə aid məsələlərlə bağlı müzakirələr aparılacaq, müvafiq qərarlar qəbul olunacaq. Sessiyanın gedişində hökumətin hesabatı müzakirə olunacaq, ötən il üçün milli iqtisadi və sosial inkişaf planının nəticələri, büdcənin icrası müzakirə olunacaq, cari il üçün plan və büdcə təsdiqlənəcək. Bundan əlavə, Yığıncağın Daimi Komitəsinin, Ali Xalq Məhkəməsinin, Ali Xalq Prokurorluğunun hesabatları dinləniləcək, ölkə əhəmiyyətli digər məsələlərə baxılacaq. Həmçinin qanunvericilik haqqında qanuna dəyişiklik layihəsinə və Dövlət Şurası (Nazirlər Kabineti) təsisatının islahatları planına baxılacaq.
Çinin ali qanunverici orqanının builki sessiyasında 2023-2028-ci illər üçün Çin Xalq Respublikasının Sədri və onun müavini, silahlı qüvvələrin ali idarəedici orqanı olan Mərkəzi Hərbi Şuranın və Ali Xalq Məhkəməsinin sədrləri, baş prokuror seçiləcək, Dövlət Şurasının sədri və Şuranın digər üzvləri təsdiqlənəcək.
Ötən ilin oktyabrında Çin Kommunist Partiyası Mərkəzi Komitəsinin üçüncü müddətə Baş katibi seçilən Si Cinpinin yenidən ÇXR Sədri postuna yeganə namizəd olacağı gözlənilir. Qanunvericiliyə əsasən, bu vəzifəyə namizədləri Xalq Nümayəndələri Yığıncağının rəyasət heyəti nümayəndələrlə müzakirələr əsasında müəyyənləşdirirsə də, ÇXR Sədri vəzifəsinə namizəd adətən Çin Kommunist Partiyası Mərkəzi Komitəsinin Baş katibi olur.
Qeyd edək ki, Çin Xalq Nümayəndələri Yığıncağı Çində dövlət hakimiyyətinin ali orqanıdır, dövlətin qanunverici funksiyalarını həyata keçirir, ölkə həyatının mühüm sahələrinə dair qərarlar qəbul edir. Yığıncağın hər çağırışının səlahiyyət müddəti 5 ildir, onun sessiyaları ildə bir dəfə çağırılır. Sessiyalar arasında olan müddət ərzində Yığıncağın funksiyalarını onun Daimi Komitəsi həyata keçirir. Çin Xalq Nümayəndələri Yığıncağı ilə paralel məşvərətçi orqan statusuna malik olan Xalq Siyasi Məşvərət Şurasının da illik sessiyası keçirilir. Şuranın martın 4-də başlayan və bir həftə davam edəcək sessiyasında ölkə həyatının siyasi, iqtisadi və sosial sahələrinə dair müzakirələr aparılacaq, təkliflər hazırlanacaq.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
