Çin Hindistanla sərhəddə hərbi düşərgələr yaradır
Bakı, 9 dekabr, AZƏRTAC
Çin Hindistanla sərhəd boyu rayonlarda münaqişələr zamanı döyüş hazırlığını artırmaq məqsədilə hərbi düşərgələrin inşasına başlayıb.
AZƏRTAC “The Times of India” qəzetinə istinadla xəbər verir ki, Hindistan kəşfiyyatının məlumatına əsasən, hazırda Şərqi Ladakh rayonunda davam edən hərbi gərginlik fonunda 20 düşərgədə tikinti işləri aparılır. Ladakh rayonunda Çin ordusunun 60 minlik hərbi kontingenti, həmçinin ağır artilleriya, raket və tank polkları yerləşdirilib. Hindistan isə bu regionda 50 minlik üç dağ diviziyası cəmləyib.
Çin Xarici İşlər Nazirliyinin rəsmi nümayəndəsi Hua Çunin Ladakh üzrə konsensusun əldə olunması istiqamətində məsləhətləşmələrin davam etdiyini bildirib. “Çin və Hindistan Ladakh rayonunda gərginliyin azaldılması və tərəflər arasında konkret razılaşmanın əldə olunması məqsədilə hərbi və diplomatik kanallar vasitəsi ilə əlaqə saxlayır”, - deyə diplomat qeyd edib.
Xatırladaq ki, may-iyun aylarında Çin və Hindistan hərbçiləri arasında toqquşmalardan sonra Şərqi Ladakh rayonunda vəziyyət gərginləşib. Toqquşmalar nəticəsində 20 hindistanlı və 45 çinli hərbçi həlak olub. İnsidentdən sonra Nyu-Dehli və Pekin bu regiondakı qoşunlarının sayını artırıb.
Bölmənin digər xəbərləri
