ÇİN PARLAMENT NÜMAYƏNDƏ HEYƏTİNİN AZƏRBAYCANA SƏFƏRİ
MİLLİ MƏCLİSDƏ GÖRÜŞ
Ümumçin Xalq Nümayəndələri Məclisi Daimi Komitəsi sədrinin müavini Timur Davamatın başçılığı ilə ölkəmizdə səfərdə olan nümayəndə heyəti iyunun 18-də Milli Məclisdə Azərbaycan-Çin dostluq cəmiyyətinin üzvləri ilə görüşmüşdür.
Cəmiyyətin sədri, Milli Məclisin deputatı, akademik Cəlal Əliyev görüşü açaraq, qonaqları cəmiyyətin üzvləri və bütün Milli Məclis adından səmimiyyətlə salamladı. O, Azərbaycan-Çin münasibətlərindən danışaraq dedi ki, bu münasibətlərin kökləri uzaq keçmişə gedib çıxır. İki xalq arasında sıx qarşılıqlı əlaqələr sovet hakimiyyəti illərində də mövcud olmuşdur. Çin nümayəndələri Azərbaycanda işləyirdilər, bizim mütəxəssislərimiz isə dost ölkədə öz ixtisaslarını təkmilləşdirirdilər. Azərbaycan müstəqillik qazandıqdan sonra əlaqələrin genişlənməsində mühüm irəliləyiş baş vermişdir. 1918-ci ildə yaradılmış Azərbaycan Xalq Cümhuriyyətinin varisi olan suveren Azərbaycan dövləti demokratik dəyərlərə və islam dəyərlərinə böyük önəm verir. Yüksək intellektual və mədəni potensiala malik olan ölkəmizdə Şərqdə ilk opera yaradılmış, balet sənəti inkişaf etmişdir. Azərbaycan çox böyük mədəni irsə malik Çin ilə sıx əməkdaşlığın olmasını istəyir.
Cəlal Əliyev Azərbaycanda gedən dəyişikliklərdən söhbət açaraq dedi ki, 1993-cü ildə Heydər Əliyev ölkə rəhbərliyinə qayıtdıqdan sonra burada geniş və intensiv islahatlar aparılmağa başlandı, torpaq kəndlilərə verildi. Fermer təsərrüfatlarının uğurlu inkişafı nəticəsində indi Azərbaycan kənd təsərrüfatı məhsulları ilə nəinki özünü təmin edir, həm də onları müxtəlif ölkələrə göndərir. Bundan əlavə, sənayedə də özəlləşdirilmə gedir.
Cəlal Əliyev bildirdi ki, ölkəmiz üçün ən ciddi problem Ermənistan-Azərbaycan, Dağlıq Qarabağ münaqişəsidir. O, bu problemin səbəb və nəticələrindən ətraflı danışaraq, ölkəmizin ədalətli mövqeyini dəstəklədiyi üçün Çin tərəfinə təşəkkürünü bildirdi.
Çin nümayəndə heyətinin rəhbəri Timur Davamat qarşılıqlı surətdə faydalı münasibətlərin inkişafından bəhs etdi, ölkəmizi Çinin dostu və tərəfdaşı adlandırdı.
Görüşdə Dostluq cəmiyyətinin üzvləri - Azərbaycanın xalq artisti Həsən Məmmədov və Milli Məclisin deputatı Rəbiyyət Aslanova da çıxış etdilər.
X X X
NAZİRLƏR KABİNETİNDƏ QƏBUL
Həmin gün Azərbaycanın baş naziri Artur Rasizadə Çin nümayəndə heyətini qəbul etdi.
Baş nazir qonaqları səmimi salamlayaraq dedi ki, ÇXR-in belə mötəbər nümayəndə heyətinin səfəri ikitərəfli münasibətlərin inkişafı yolunda daha bir addımdır. O, dövlət və hökumət başçılarının Almatıda keçirilmiş sammitində Ümumçin Xalq Nümayəndələri Məclisi Daimi Komitəsinin sədri Li Pen ilə görüşü barədə də qonaqlara məlumat verdi.
Artur Rasizadə ikitərəfli iqtisadi əməkadaşlığın perspektivlərindən danışaraq bildirdi ki, bütün güclü dövlətlər kimi, Çin də böyük potensiala malikdir. Bu ölkənin Azərbaycanla iqtisadi əməkadşlığın inkişafına böyük diqqətlə yanaşması faktı hörmətə layiqdir. Baş nazir xüsusi varğuladı ki, iki ölkə arasında qarşılıqlı surətdə faydalı əməkadaşlığın əsası Azərbaycan Prezidenti Heydər Əliyevin 1994-cü ildə Çinə rəsmi səfəri zamanı qoyulmuşdur. Həmin səfər zamanı imzalanmış sazişlər münasibətlərimizin hüquqi əsasını yaratmışdır.
Sonra Artur Rasizadə Azərbaycanın Ermənistan tərəfindən işğal edilmiş ərazilərinin qeyd-şərtsiz azad olunması barədə BMT Təhlükəsizlik Şurasında qətnamə qəbul edilərkən ölkəmizin ədalətli mövqeyini dəstəklədiyinə görə Çin tərəfinə öz minnətdarlığını bildirdi. O həmçinin dedi ki, Azərbaycan Tayvan məsələsində ÇXR-in mövqeyini dəstəkləyir, bu ölkənin ərazi bütövlüyünə hörmət edir.
Timur Davamat səmimi qəbula görə minnətdarlığını bildirərək, Bakıda keçirdiyi görüşlər barədə ətraflı məlumat verdi. O, eyni zamanda, Çin parlamentinin sədri Li Penin salamını baş nazirə çatdırdı.
Sonra Timur Davamat Çində həyata keçirilən iqtisadi islahatlardan danışaraq dedi ki, özəl bölmənin inkişafı nəticəsində Çin əhalisinin sosial vəziyyəti yaxşılaşmışdır. O, bunu da əlavə etdi ki, ötən il Çinlə Azərbaycan arasında əmtəə mübadiləsi 15 milyon dollar təşkil etmiş, bu il isə həmin göstəriciləri artırmaq nəzərdə tutulmuşdur. Bundan əlavə, cari ilin mart ayında Çinin neft şirkəti neft yatağının işlənilməsi üzrə tenderin qalibi olmuş və bu sahəyə 52 milyon dollar qoymuşdur.
Qəbulda Milli Məclis sədrinin müavini Ziyafət Əsgərov, Çinin Bakıdakı səfiri Çjan Siyun iştirak edirdilər.
Bölmənin digər xəbərləri
