ÇİN SƏFİRLİYİNDƏ AZƏRBAYCAN PREZİDENTİ İLHAM ƏLİYEVƏ HƏSR EDİLMİŞ KİTABLARIN TƏQDİMATI OLMUŞDUR
Xəbər verdiyimiz kimi, Çin Xalq Respublikasının ölkəmizdəki səfirliyi və Azərbaycan-Çin Dostluğu və Əməkdaşlığı Cəmiyyəti Azərbaycan Respublikasının Prezidenti İlham Əliyevin 2003-cü il oktyabrın 31-də keçirilən təntənəli andiçmə mərasimində söylədiyi nitqini hədiyyə nəşri və miniatür kitab şəklində nəfis tərtibatda çap etdirmişdir.
Martın 2-də Çin Xalq Respublikasının Bakıdakı səfirliyində kitabların təqdimat mərasimi keçirilmişdir.
Son zamanlar Çin-Azərbaycan münasibətlərində mühüm irəliləyişlərin olduğunu söyləyən səfir Çjan Siyun Prezident İlham Əliyevin Çinə nəzərdə tutulan dövlət səfərini ölkələrimiz arasındakı münasibətlərin inkişafında yeni mərhələ olacağını vurğulamışdır. Səfir demişdir: “Azərbaycan Prezidentinin siyasətini, ümummilli lider Heydər Əliyevin Çin barəsində siyasi xəttinin varisliyini ölkəmizdə yüksək qiymətləndirirlər. Dost Azərbaycanda baş verən bütün hadisələrə Çində maraq artır. Çin sərmayəçiləri də Azərbaycana böyük maraq göstərirlər. Bizə “Azərbaycan Respublikasının Prezidenti İlham Əliyevin andiçmə nitqi” kitabını qarşıdakı böyük səfər ərəfəsində Azərbaycan-Çin Dostluğu və Əməkdaşlığı Cəmiyyəti ilə birlikdə Çin dilində nəşr etdirmək şərəfi nəsib olmuşdur. Ümidvaram ki, bu kitab Azərbaycanı, ölkənizin hökumətinin siyasi xəttini xalqımıza daha yaxşı tanımağa kömək edəcək və xalqlarımızın qarşılıqlı anlaşmasına xidmət edəcəkdir”.
Kitablarda Prezident İlham Əliyevin tərcümeyi-halı ilk dəfə olaraq Çin dilində verilmişdir.
Mərasimdə Milli Məclisin deputatları, dövlət qurumlarının və ictimaiyyətin nümayəndələri, Azərbaycan-Çin Dostluğu və Əməkdaşlığı Cəmiyyətinin üzvləri iştirak etmişlər.
Bölmənin digər xəbərləri
