Çingiz Qənizadə: Zəfər paradı Azərbaycanın hərbi gücünü dünyaya nümayiş etdirdi
Bakı, 11 dekabr, AZƏRTAC
Azərbaycan Silahlı Qüvvələrinin Vətən müharibəsindəki tarixi Qələbəsinə həsr olunmuş möhtəşəm Zəfər paradından bir il ötür. Lakin hər bir soydaşımız həmin günü qürurla xatırlayır. Çünki bu, XXI əsrin Zəfər paradı idi. İndiyədək dünyanın heç bir ölkəsi 44 gün ərzində müharibəni qalib kimi başa vurmayıb. Bu tarixi gün yalnız Azərbaycana məxsusdur. Zəfər paradı Azərbaycan Ordusunun gücünü, dövlətimizin qüdrətini bir daha bütün dünyaya nümayiş etdirdi. Dünyanın inkişaf etmiş dövlətlərinin və nüfuzlu beynəlxalq təşkilatların 30 il ərzində nizamlaya bilmədiyi münaqişə Azərbaycan Prezidenti, Müzəffər Ali Baş Komandan İlham Əliyevin qətiyyəti və polad iradəsi sayəsində 44 gün ərzində öz həllini tapdı.
Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.
Hüquq müdafiəçisi qeyd edib ki, 2020-ci il dekabrın 10-da Azadlıq meydanında Azərbaycan Silahlı Qüvvələrinin Vətən müharibəsində qazandığı parlaq Qələbəyə həsr olunmuş Zəfər paradında nümayiş etdirilən silah-sursat, nizami ordu Azərbaycan Silahlı Qüvvələrinin dünyanın ən güclü 50 ordularından biri olduğunu bir daha təsdiqlədi. Zəfər paradında Azərbaycan Prezidenti İlham Əliyevlə yanaşı, qardaş Türkiyə Respublikasının Prezidenti Rəcəb Tayyib Ərdoğanın da iştirak etməsi Azərbaycan-Türkiyə əlaqələrinin ən yüksək səviyyədə olduğunu, bu münasibətlərin dünyada analoqu olmayan, “Bir millət, iki dövlət” prinsipinə uyğun davam etdiyini göstərdi.
Müzəffər Ali Baş Komandan İlham Əliyevin Zəfər paradındakı çıxışına istinad edən Ç.Qənizadə bildirib: “Həmin gün tarixi bir gün idi. Çünki Azərbaycanın qalibiyyət bayramı idi. Otuz il ərzində düşmən əsarətində qalmış ərazilərimizin işğaldan azad edilməsinə həsr olunun Zəfər paradı idi. Xatırladım ki, Prezident, Ali Baş Komandan İlham Əliyevin rəhbərliyi ilə rəşadətli Ordumuz işğal altında olan Azərbaycan torpaqlarını cəmi 44 gün ərzində azad edərək qəhrəmanlıq salnaməsi yazdı. Bu Qələbə hərbçilərimizin canı-qanı, xalqımızın birliyi, respublikamızda yaşayan bütün millətlərin nümayəndələrinin iştirakı hesabına qazanıldı. Bu Qələbədə ölkəmizin iqtisadi qüdrəti də mühüm rol oynadı. Azərbaycan Prezidenti İlham Əliyevin uzaqgörən siyasəti, hücum diplomatiyası, bu tarixi Qələbənin qazanılmasında xüsusi qeyd edilməli amillərdəndir. Bütün xalq, millət, ordu, ölkəmizdə yaşayan azsaylı xalqların nümayəndələri bir yumruq kimi birləşdi və “dəmir yumruq” düşmənin başını əzdi. Bu Qələbəni dünyaya nümayiş etdirən isə Zəfər paradı oldu. Hərbi paradların keçirilməsi dünya praktikasında da mövcuddur. Bu paradlarda dövlət, nəinki öz xalqına, eləcə də, dostlarına, düşmənlərinə və dünyaya nəyə qadir olduğunu nümayiş etdirir.
Zəfər paradında 3 mindən çox şəxsi heyətimiz, 150-dək hərbi texnikamız, silahlanmaya yeni qəbul edilən hərbi texnikalar, raket-artilleriya qurğuları, zenit-raket kompleksləri, hava hücumundan müdafiə sistemləri, eləcə də, dəniz qüvvələrimiz, hərbi gəmilərimiz nümayiş etdirildi. Bu parad dünya ictimaiyyəti tərəfindən maraqla izlənildi. Təsadüfi deyil ki, bir il bundan qabaq dünyanın gözü Azərbaycanda idi və Azadlıq meydanındakı Zəfər paradını izləyirdi”.
Ç.Qənizadə Prezident İlham Əliyevin 2018-ci il iyunun 26-da Azadlıq meydanında Azərbaycan Silahlı Qüvvələrinin 100 illiyi münasibətilə keçirilən hərbi paradda çıxışından bir məqamı xatırladıb: Müzəffər Ali Baş Komandan çıxışında demişdi: “Gün gələcək və bu gün işğal altındakı torpaqlar azad olunandan sonra orada qaldırılacaq Azərbaycan bayrağı Azadlıq meydanına gətiriləcək və hərbi paradda göstəriləcək. Biz bu günü yaxınlaşdırmalıyıq və yaxınlaşdırırıq”.
Hüquq müdafiəçisi deyib ki, həm Azərbaycan, həm də dünya ictimaiyyəti həmin günün şahidi oldu. Qəhrəman Azərbaycan Ordusu ötən il noyabrın 8-də Qarabağın incisi, Azərbaycanın mənəvi paytaxtı Şuşanı azad etdi və Ermənistanı 2020-ci il noyabrın 10-da təslimçilik aktını imzalamağa məcbur etdi.
Ç.Qənizadə vurğulayıb ki, Azərbaycan Ordusu Zəfər paradında hərbi potensialını nümayiş etdirməklə yanaşı, həm də beynəlxalq aləmə gücü, qüdrəti barədə mesaj verdi. Azərbaycan bu parad ilə bir daha göstərdi ki, ölkəmizə qarşı istənilən təhdid və hücumların qarşısını ala biləcək rəşadətli ordumuz var. Qəhrəman Azərbaycan Ordusunun Vətən müharibəsində əldə etdiyi tarixi Qələbə münasibətilə təşkil olunan Zəfər paradından bir il ötsə də, bu tarixi gün xalqımızın və Ordumuzun qələbə salnaməsi kimi yaddaşlarda əbədi qalacaq.
Bölmənin digər xəbərləri
