ÇİNGİZ XANIN ÖZ ƏLİLƏ YAZDIĞI SƏNƏDİN TAPILDIĞI BİLDİRİLİR
AZƏRTAC xarici informasiya agentliklərinə istinadla xəbər verir ki, Daxili Monqolustan Universitetinin (Çin) professoru Tenqus Bayarin gözlənilməz bəyanatla çıxış edərək, bildirmişdir ki, onun əlində bunu sübut edən sanballı dəlillər var. Bayarinin dediyinə görə, Çingiz xanın öz əli ilə yazdığı fərman mövcuddur. Tarixçi alim sənədin 1229-cu ilə aid olduğunu qeyd edərək söyləyir ki, öz əli ilə yazaraq çinli bir rahibə ünvanladığı bu fərmanda imperator onun daosizmə dair traktatını asudə vaxtlarında oxuyacağını bildirmişdir. Bayarin sensasiyalı kəşfin başqa təfsilatlarını hələlik açıqlamır.
Əvvəllər hökmdarın yazıb-oxuya bilməməsini Monqolustanda yazı mədəniyyətinin yalnız XIII əsrin əvvəllərində yaranması ilə izah edirdilər. O zaman Çingiz xanın təqribən 40 yaşı vardı və onun, guya, yazı-pozu öyrənməyə heç vaxtı da yoxmuş. Bayarinin tapıntısının bunu təkzib edib-etməyəcəyini zaman göstərəcəkdir. Hələliksə, imperatorun heç də az əhəmiyyəti olmayan belə bir bacarığı təkzibolunmazdır ki, o, qeyri-adi dərəcədə güclü nəsiltörətmə qabiliyyətinə malik kişi imiş.
Bu yaxınlarda genetiklər etiraf etmişlər ki, hazırda dünyada yaşayan 16 milyon insan özünü böyük monqol sərkərdəsinin birbaşa nəslindən hesab edə bilər. Onların genetik kodu Çingiz xanın nişanələrini daşıyır. Yalnız kişi orqanizmində olan müəmmalı Y xromosomunu öyrənən britaniyalı alim Brayan Saykis bildirmişdir ki, hazırda milyonlarla insan bu xromosomun yalnız Çingiz xanın özünə və onun nəslinə xas olan səciyyəvi növünə malikdir.
Məsələ bundadır ki, Çingiz xan nəhəng bir imperiya yaratmışdı və ona tabe olan bütün ölkələr ən gözəl qadınları bu hökmdarın hərəmxanasına göndərirdi. Cahangir hökmdarın nəsilləri də ondan geri qalmamış, saysız-hesabsız hərəmxanalar sahibi olmuşlar.
