Coğrafiya fənni üzrə hazırlıq kursu başlanıb
Bakı, 3 dekabr, AZƏRTAC
Dövlət İmtahan Mərkəzində (DİM) coğrafiya fənni üzrə qəbul imtahanında istifadə edilən qiymətləndirmə tapşırıqlarının hazırlanması, ekspertizası və yoxlanılmasına dair hazırlıq kursunun ilk məşğələsi keçirilib.
DİM-dən AZƏRTAC-a bildirilib ki, əyani və onlayn formada keçirilən hazırlıq kursunda yalnız elektron qeydiyyatdan keçmiş, ixtisası müvafiq fənnə uyğun olan müəllimlər, metodistlər və pedaqoji profilli ali təhsil müəssisələrinin bakalavriat səviyyəsində həmin fənn üzrə təhsil alan sonuncu kurs tələbələri və magistrantlar iştirak ediblər.
Hazırlıq kursunda DİM-in şöbə müdiri Afiqə Batıyeva kursun iş planı və qrafiki haqqında məlumat verib.
Sonra moderator Nərminə Seyfullayeva müvafiq fənn kurikulumunun mahiyyəti, məzmunu və strukturu ilə bağlı təqdimat edib. Təqdimat ətrafında müzakirələr aparılıb. Kurs iştirakçılarını maraqlandıran suallar cavablandırılıb.
Hazırlıq kursunun ikinci məşğələsi növbəti həftə keçiriləcək.
Bölmənin digər xəbərləri
