Daha 50 hərbçinin meyitləri Ukraynaya təhvil verilib
Kiyev, 27 oktyabr, AZƏRTAC
Moskva Ukraynanın azadlığı və müstəqilliyi uğrunda həlak olmuş daha 50 hərbi qulluqçunun meyitlərini Kiyevə təhvil verib.
AZƏRTAC hərbi əsirlərlə rəftar məsələləri üzrə Koordinasiya Şurasının “Telegram” kanalına istinadla xəbər verir ki, Ukrayna tərəfi cümə günü repatriasiya tədbirləri nəticəsində öz nəzarətində olan ərazilərə 50 hərbi qulluqçunun meyitlərini qaytarmağa nail olub.
Həlak olan hərbi qulluqçuların meyitlərinin qaytarılması işi ilə hərbi əsirlərlə rəftar məsələləri üzrə Koordinasiya Şurası, Ukrayna Təhlükəsizlik Şurası, Daxili İşlər Nazirliyi, Ukrayna Silahlı Qüvvələri, Sum vilayəti Fövqəladə hallar üzrə dövlət idarəsi, sərhədçilər və Beynəlxalq Qırmızı Xaç Cəmiyyətinin nümayəndələri məşğul olublar.
Qeyd edək ki, Rusiya və Ukrayna arasında mütəmadi olaraq hərbi qulluqçuların meyitlərinin mübadiləsi aparılır. Belə ki, oktyabrın 6-da həlak olan daha 64 hərbçinin meyitləri Kiyevə təhvil verilib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
