DAHA BİR AZƏRBAYCAN PƏHLƏVANI HƏRBÇİLƏR ARASINDA DÜNYA ÇEMPİONATININ QIZIL MEDALINI QAZANMIŞDIR

31.10.2006 [20:41]
Çap et
A⁺ A^-

AZƏRTAC xəbər verir ki, oktyabrın 31-də Heydər Əliyev adına İdman-Konsert Kompleksində hərbçilər arasında yunan-Roma güləşi üzrə dünya çempionatında 60, 74 və 96 kiloqram çəkilər üzrə qaliblər müəyyənləşmişdir.

60 kiloqram çəkidə mübarizə aparan Azərbaycan güləşçisi Taleh İsrafilov Çin, Hindistan və Türkiyə idmançılarına qalib gələrək finala çıxmışdır. Həlledici görüşdə rusiyalı Basanq Boktayevi məğlub edən pəhləvan dünya çempionatının qalibi olmuşdur. Rusiyalı idmançıya gümüş, türkiyəli Emik Bünyamin və suriyalı Mustafa Əl Nəkədliyə bürünc medallar təqdim olunmuşdur.

74 kiloqram çəkidə rusiyalı Yevgeni Popov fəxri kürsünün ən yüksək pilləsinə qalxmışdır. Litvalı Aleksandr Kazakeviç ikinci, Andrey Boronovski (Belarus) və Mikola Daraqan (Ukrayna) isə üçüncü yeri tutmuşlar.

Nəhayət, günün sonunda 96 kiloqram çəkidə idmançıların final görüşləri olmuşdur. Rusiyalı David Kaladze litvalı Ezerskis Mindauqasa qalib gələrək dünya çempionatının qızıl medalına layiq görülmüşdür. Litva idmançısı gümüş, Slovakiya güləşçisi Roman Meduna və belaruslu Şata Narmaniya isə bürünc medallara sahib olmuşlar.

Noyabrın 1-də yarışlara sərbəst güləşçilər qoşulacaqlar.