David Zalkaliani: Gürcüstan Azərbaycan və Türkiyə ilə əməkdaşlığın bütün sahələrdə inkişafında maraqlıdır
Tbilisi, 23 dekabr, AZƏRTAC
Gürcüstan Azərbaycan və Türkiyə ilə əməkdaşlığın bütün sahələrdə, ikitərəfli və üçtərəfli formatlarda inkişafında maraqlıdır.
AZƏRTAC xəbər verir ki, bu sözləri Gürcüstan Xarici İşlər naziri David Zalkaliani jurnalistlərə açıqlamasında söyləyib.
Hazırda bu üç ölkə arasında münasibətlərin strateji tərəfdaşlıq səviyyəsində olduğunu deyən nazir bildirib: “Biz Türkiyənin Xarici İşlər naziri Mövlud Çavuşoglu ilə görüşdə bu məsələni müzakirə etdik. Azərbaycanlı həmkarımla da müzakirə edəcəyik. Düşünürəm ki, bu görüşlər münasibətlərimizin daha da möhkəmlənməsinə və qarşıya qoyulan məqsədlərə çatmağımıza xidmət edəcək”.
Regionda həyata keçirilən irimiqyaslı enerji və nəqliyyat layihələrinə toxunan nazir deyib: “Bu yaxınlarda Türkiyədə Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın da iştirakı ilə TANAP kəmərinin Avropaya birləşən hissəsinin açılışında iştirak etdik. Bu, bizim strateji tərəfdaşlığımızı və mövqelərimizi daha da möhkəmləndirir. Azərbaycan, Gürcüstan və Türkiyənin birgə iştirakı ilə həyata keçirilən Bakı-Tbilisi-Ceyhan neft, Bakı-Tbilisi-Ərzurum qaz kəmərləri, TANAP, Bakı-Tbilisi-Qars dəmir yolu və digər layihələr təkcə bizim ölkələrin və regionun deyil, bütövlükdə Avropanın enerji təhlükəsizliyində və əlaqələrimizin inkişafında mühüm rol oynayır”.
D.Zalkaliani üçtərəfli görüşdə bu məsələlərin bir daha nəzərdən keçiriləcəyini qeyd edib.
Xətayi Əzizov
AZƏRTAC -ın xüsusi müxbiri
Tbilisi
Bölmənin digər xəbərləri
