Denis Şmıqal: Ukraynada döyüş sursatının böyük qıtlığı yaranıb
Bakı, 24 oktyabr, AZƏRTAC
Həm Ukraynada, həm də dünyada döyüş sursatının böyük qıtlığı müşahidə edilir.
AZƏRTAC xəbər verir ki, bunu Ukraynanın Baş naziri Denis Şmıqal “Financial Times” qəzetinə müsahibəsində deyib.
“Nəinki Ukraynada, həmçinin dünyada döyüş sursatında böyük çatışmazlıq müşahidə edilir. Bütün dünyada döyüş sursatı ehtiyatları tükənir, anbarlar boşalır və bu səbəbdən onları Ukraynada istehsal etməliyik”, - deyə Denis Şmıqal bildirib.
Onun sözlərinə görə, Ukrayna Qərb ölkələrindən asılılığı azaltmaq üçün sursatı özü istehsal etməlidir. Hazırda prioritet məsələ ölkədə ABŞ və Avropanın silah kompaniyaları ilə birgə istehsalı təşkil etməkdir. Artıq “Ukroboronprom” konserni zədələnmiş “Leopard” tanklarının və digər texnikanın təmiri və bəzi zirehli maşınların istehsalı üzrə Almaniyanın “Rheinmetall” konserni ilə saziş imzalayıb.
Xatırladaq ki, sentyabrın 29-da Kiyevdə müdafiə sənayesi sahəsində 30 ölkənin və 252 həbi kompaniyanın iştirak etdiyi ilk forum baş tutub. Ukrayna Prezidenti Volodimir Zelenski forumda 23 ölkədən 59 kompaniyanı birləşdirən müdafiə sənayesi alyansının yaradıldığını elan edib. Forum çərçivəsində Ukrayna kompaniyaları xarici tərəfdaşları ilə pilotsuz aparatlar və döyüş sursatlarının istehsalı da daxil olmaqla, 20 saziş imzalayıb.
Bölmənin digər xəbərləri
