Bakı, 11 aprel, AZƏRTAC

2018-ci il aprelin 11-də Azərbaycan xalqı növbəti dəfə müdriklik göstərərək inamlı, güclü, sabit, inkişaf edən gələcəyə səs verdi. Ölkəmizdə Prezident İlham Əliyevin hakimiyyətinin yeni dönəmi başlandı. Tarixin sonrakı gedişatı Azərbaycan xalqının seçiminin nə dərəcədə doğru olduğunu göstərdi. Əslində burada ciddi bir qanunauyğunluq da var idi. Ulu öndər Heydər Əliyevin siyasi məktəbinin ən parlaq nümunəsi olan Prezident İlham Əliyev son seçkilərə qədər olan dövrdə seçkiqabağı verdiyi bütün vədləri yerinə yetirib. Nəticədə Azərbaycan regionda güclü dövlətə çevrilib, iqtisadiyyatımız bütövlükdə Cənubi Qafqaz regionunun böyük bir hissəsini təşkil edib. İnsanların sosial rifah şəraiti də kifayət qədər yaxşılaşıb, ölkədə azad iqtisadi mühit yaradılıb, işsizlik tarixi minimumlara enib. Hakimiyyəti dövründə hər zaman Azərbaycanın ərazi bütövlüyü məsələsini öz siyasətinin mərkəzində saxlayan Prezident İlham Əliyev beynəlxalq müstəvidə ciddi uğurlar əldə edib, paralel olaraq ordu quruculuğuna, onun maddi-texniki bazasının yaxşılaşdırılmasına xüsusi diqqət göstərib.

Bunu AZƏRTAC-a açıqlamasında Milli Məclisin Gənclər və İdman komitəsinin sədr müavini, YAP İdarə Heyətinin üzvü Şahin İsmayılov deyib.

Onun sözlərinə görə hər seçkidə seçicilər ötən dövr ərzində görülmüş işlərə nəzər salır və öz gələcəklərinə səs verirlər. Əhalinin böyük bir hissəsinin Prezident İlham Əliyevi dəstəkləməsi, onun Azərbaycan xalqının inamını, etibarını, sevgisini qazandığını bir daha əyani şəkildə göstərdi. Müdrik Azərbaycan xalqı yaxşı bilirdi ki, Azərbaycanın uğurlu gələcəyi, ərazi bütövlüyümüzün bərpa olunması məhz Prezident İlham Əliyevin rəhbərliyi ilə mümkün ola bilər. Yeri gəlmişkən qeyd etmək istərdim ki, seçki nəticəsində seçicilərin böyük bir hissəsinin Prezident İlham Əliyevə səs verməsini seçkiləri müşahidə edən beynəlxalq müşahidəçilər və təşkilatlar da öz hesabatlarında əks etdirdilər. Burada Azərbaycan xalqı bir daha heç bir siyasi perspektivi olmayan, tarixin tozlu səhifələrində qalan qaragüruhçulara da öz yerini göstərdi. Onların Azərbaycan tarixində artıq heç bir yeri yox idi.

Sonuncu Prezident seçkilərindən sonra Azərbaycan tarixinin yeni mərhələsinin başlandığını qeyd edən Şahin İsmayılov vurğulayıb ki, Azərbaycan bütün istiqamətlərdə inkişafını davam etdirir. Bu inkişaf özünü ciddi islahat dalğası ilə müşahidə edir. Azərbaycan Prezident İlham Əliyevin rəhbərliyi ilə qarşısına qoyduğu hədəflərə əmin addımlarla irəliləyir.

“Prezident İlham Əliyevin 2018-ci ildə növbəti dəfə seçildikdən sonrakı müddət üçün fəaliyyətindən bəhs edərkən şərti olaraq yerli, qlobal və Qarabağ məsələsi olmaqla 3 istiqamət üzrə bölə bilərik.

Yerli məsələlərə idarəçilik sisteminin təkmilləşdirilməsi və daha çevik sistemin qurulmasına xidmət edən islahatlar prosesi, sosial müdafiə məsələləri, koronavirusla mübarizə və insanların rifahı üçün görülən çoxsaylı işləri aid edə bilərik. Bütün sahələrdə olduğu kimi gənclər və idman sahəsində də ciddi uğurlar əldə olunub, gənclərin inkişafı və idmançılarımızın beynəlxalq tribunalarda bayrağımızı qaldırması üçün lazımi şərait yaradılıb.

Qlobal məsələlərə Azərbaycanın Qoşulmama Hərəkatına sədrliyi və bunun Hərəkatın üzvləri tərəfindən yüksək qiymətləndirilməsini, BMT Baş Assambleyasının COVID-19-a qarşı mübarizə üzrə dövlət və hökumət başçıları səviyyəsində xüsusi sessiyasının keçirilməsi təşəbbüsünün reallaşdırılmasını, Azərbaycan Prezidentinin təşəbbüsü ilə COVID-19 peyvəndləri ilə bağlı qətnamənin BMT-yə üzv dövlətlər tərəfindən qəbul edilməsini, Ümumdünya Səhiyyə Təşkilatının Azərbaycan dövlətinə koronavirusla mübarizə sahəsindəki fəaliyyətinə görə təşəkkür elan etməsini, dünyanın müxtəlif ölkələri ilə səmərəli əməkdaşlığın qurulmasını və çox sayda digər işləri aid edə bilərik”, - deyə deputat bildirib.

O deyib ki, Müzəffər Ali Baş Komandanın Qarabağ məsələsi ilə bağlı fəaliyyət dövrünü də üç yerə bölə bilərik: müharibəyə qədər, müharibə və postmüharibə dövrü.

“Müharibəyə qədər olan dövrü Ordunun gücləndirilməsi istiqamətində görülən işlər, diplomatik münasibətlər və hərtərəfli hazırlıq kimi amillərlə xarakterizə edə bilərik. Ölkə Prezidentinin 2019-cu ilin oktyabrında “Valday” Beynəlxalq Diskussiya Klubunun XVI illik iclasının plenar sessiyasında Ermənistanın baş nazirinin sərsəm iddiasına cavab olaraq söylədiyi tarixi ifadəsi - “Qarabağ Azərbaycandır və nida işarəsi” sözləri işğal altında olan ərazilərimizin azadlıq simvoluna çevrilib və reallığa çevrilən qiymətli söz kimi tarixə düşüb. Azərbaycan Prezidentinin Ermənistanın baş nazirinə tarix və siyasət dərsi keçməsi ilə yadda qalan Münhen Təhlükəsizlik Konfransının məlum panel müzakirəsi dünya mediasında geniş şəkildə işıqlandırılıb. Azərbaycan sülh təklifini qüvvədə saxlasa da işğal altında olan torpaqlarını müharibə yolu ilə azad etmək üçün düşünülmüş və əhəmiyyətli işlər görməkdə idi.

Müharibə dövrü üzrə Ali Baş Komandanın qətiyyətli mövqeyi, təzyiqlərə qarşı müqavimət, o cümlədən ölkəmizin əleyhinə haqsız yerə qəbul ediləcək sənədlərin qarşısının alınması, görünən və görünməyən bir çox məsələləri qeyd etmək olar.

Postmüharibə dövrünə Azərbaycan ilə Türkiyə arasında müttəfiqlik münasibətləri haqqında Şuşa Bəyannaməsi, Moskvada "Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında" Bəyannamə, Qarabağda infrastruktur və yenidənqurma işlərinin yüksək sürətlə həyata keçirilməsi, böyük qayıdış prosesinin başlanması kimi hadisələri aid edə bilərik. Prezident İlham Əliyevin yerli və xarici media nümayəndələri üçün 4 saatdan çox davam edən mətbuat konfransı dünyanın diqqətini cəlb etmişdi. Moskva və Soçidə Rusiya Prezidenti Vladimir Putin, Azərbaycan Prezidenti İlham Əliyev və Ermənistanın baş naziri Nikol Paşinyan arasında 11 yanvar və 26 noyabr tarixli üçtərəfli görüşlər keçirilərkən Azərbaycanın maraqları təmin olunmuşdur. Cari ilin aprel ayının 6-da Avropa İttifaqı Şurasının Prezidenti Şarl Mişelin təşəbbüsü və iştirakı ilə Avropa İttifaqı, Azərbaycan və Ermənistan arasında Brüsseldə keçirilmiş üçtərəfli görüşün nəticəsində Azərbaycanın maraqlarına uyğun olaraq sülh müqaviləsinin hazırlanması üzrə Ermənistan və Azərbaycan arasında işçi qrupunun yaradılması, həmçinin sərhədlərin delimitasiyası üzrə komissiyanın təsis edilməsi barədə qərarlar qəbul olunub”, - deyə Şahin İsmayılov diqqətə çatdırıb.

Deputat vurğulayıb ki, Azərbaycan xalqı Prezidentinə güvənir və onun yanındadır. Prezident İlham Əliyev xalqın inamından güc alır. O, dövlət başçısına xas olan bütün müsbət əlamətləri özündə birləşdirib. Xalqını sevir, xalqın etimadını, dəstəyini qazanır və ən əsası mahir siyasətçidir. Ümummilli lider Heydər Əliyevin layiqli davamçısı, Müzəffər Ali Baş Komandan İlham Əliyevin rəhbərliyi ilə ölkəmiz bundan sonra daha böyük uğurlar qazanacaq.