Deputat: Azərbaycanlıların taleyi erməni separatizminə dəstək verənləri narahat etmir
Bakı, 20 oktyabr, AZƏRTAC
Avropa İttifaqının bəzi üzvlərinin və müvafiq təsisatlarının Azərbaycana qarşı selektiv yanaşma nümayiş etdirmələri təəssüf və hiddət doğurur. Onlar ölkəmiz haqqında dezinformasiya yaymaqla məşğuldurlar və erməni separatizminə dəstək verirlər.
AZƏRTAC xəbər verir ki, bunu Milli Məclisin deputatı Bəhruz Məhərrəmov parlamentin oktyabrın 20-də keçirilən plenar iclasında cari məsələlərin müzakirəsi zamanı deyib.
Deputat bildirib ki, Azərbaycanın 20 faizi otuz ildən artıq müddət ərzində Avropa Şurasının üzvü tərəfindən işğal altında saxlanılıb. “Ölkəmizin apardığı lokal xarakterli antiterror tədbirlərindən sonra Qarabağın erməni əhalisinin könüllü olaraq getmələri bəzi qüvvələri narahat edir. Onda soruşmaq lazımdır ki, 300 mindən artıq azərbaycanlının Qərbi Azərbaycana qayıdışının təmin edilməsi, mina səbəbindən Qarabağa, Şərqi Zəngəzura qayıda bilməyən vətəndaşlarımızın taleyi niyə onları narahat etmir”, - deyə Bəhruz Məhərrəmov vurğulayıb.
Bölmənin digər xəbərləri
