Deputat: Brüssel görüşündə əldə edilən nəticələr Azərbaycan strateji diplomatiyasının növbəti uğurudur
Bakı, 7 aprel, AZƏRTAC
Brüssel görüşündə əldə edilən nəticələr Azərbaycan strateji diplomatiyasının növbəti uğuru, eyni zamanda, postmüharibə reallıqlarının dünyaya qəbul etdirilməsidir.
Bunu AZƏRTAC-a açıqlamasında Milli Məclisin deputatı Hikmət Babaoğlu söyləyib.
Beynəlxalq münasibətlər sisteminin həddindən artıq mühafizəkar və eqoist olduğunu diqqətə çatdıran H.Babaoğlu bildirib ki, yaradılan yeni reallıq hər nə qədər beynəlxalq hüquqa uyğun olsa da, onu qəbul etdirmək çox çətindir. Bu isə beynəlxalq münasibətlər sistemini formalaşdıran güc mərkəzlərinin paralel nizam yanaşması ilə əlaqədardır. Bu paralel nizama əksər hallarda ikili standartlar siyasəti də deyirik. Yəni, əsas aktorların maraqlarına uyğun gələn problemlər beynəlxalq hüquqa uyğun olmasa da, qlobal güc mərkəzləri tərəfindən dəstəklənir. Qarabağla bağlı vəziyyət də belə idi.
“Ancaq Azərbaycan bu məsələni həll etməklə dünyanın güc mərkəzlərini fakt qarşısında qoydu və imperialist mərkəzlərin bu reallığı qəbul etməkdən başqa çarələri qalmadı. Brüsseldə keçirilən görüşdən sonra Ş.Mişelin mətbuat üçün bəyanatında əksini tapan məsələlər də postmüharibə mərhələsi üçün Azərbaycanın irəli sürdüyü beş baza prinsipinə söykənir. Bu baza prinsipləri beynəlxalq hüquqa və Azərbaycanın maraqlarına tamamilə uyğundur. Qeyd etmək lazımdır ki, hələ 2021-ci ilin dekabrında keçirilən üçtərəfli görüşdə, əslində, məhz bu prinsiplər əsasında mümkün gündəm müəyyənləşdirilmişdi. Yəni, artıq postmüharibə mərhələsində davamlı sülh üçün yeni danışıqlar platforması kimi qəbul edə biləciyimiz Brüssel-Bakı-İrəvan xəttinin əsasları həmin vaxt qoyulmuşdu”, - deyə H.Babaoğlu qeyd edib.
Deputatın sözlərinə görə, hazırda bu əsaslarda sülh danışıqlarını irəli götürmək üçün mexanizmlərin yaradılması baş verir. Burada önə çıxan əsas məsələlərdən biri xarici işlər nazirlərinin birbaşa əməkdaşlıq etməsinin nəzərdə tutulmasıdır. Bu, nəticə əldə etmək üçün olduqca çevik və səmərəli formadır. İkinci məsələ aprel ayının sonunadək sərhədlərin delimitasiya və demarkasiyası ilə bağlı müvafiq komissiyanın yaradılmasıdır. Eyni zamanda, diqqətçəkən daha bir məsələ hazırda sərhədlərdə mövcud olan reallığın toxunulmazlığıdır.
H.Babaoğlu vurğulayıb ki, digər mühüm məsələ bəyanatda və danışıqlarda ATƏT və onun Minsk qrupunun ümumiyyətlə xatırlanmamasıdır. Onun əvəzinə, hər iki tərəfin etimad etdiyi Avropa İttifaqının danışıqları himayə etməsi gerçəkliyidir ki, bu da özlüyündə tamamilə yeni və səmərəli bir format yaradır. Bundan başqa, hər hansı status əsla xatırladılmır, tam əksinə, regionda yaşayan bütün insanların rifahı naminə sülhə ehtiyac olduğu vurğulanır.
Deputat diqqətə çatdırıb ki, bəyanatda kommunikasiyaların, o cümlədən avtomobil nəqliyyatı kommunikasiyasının açılmasının zəruriliyi qeyd edilir. Yəni, sənəddə alqışlanan dəmir yolu xətti ilə bərabər, avtomobil yolunun açılması zərurəti də öz əksini tapır.
“Əgər minaların təmizlənməsi, itkin düşən insanların taleyinə aydınlıq gətirilməsi kimi humanitar paketə daxil olan məsələləri də nəzərə alsaq, deyə bilərik ki, Azərbaycan Brüsseldə istədiyini əldə etdi. Bu isə Azərbaycan Prezidenti İlham Əliyevin Avropa İttifaqı Şurasının Prezidenti Şarl Mişellə şəxsi zəmində olan qarşılıqlı etimada söykənən münasibətləri və Aİ ilə Azərbaycan arasında gələcək tərəfdaşlıq münasibətləri kontekstində baş tutdu”, - deyə Hikmət Babaoğlu qeyd edib.
Bölmənin digər xəbərləri
