Deputat: Ermənistan sərhəd anlayışını keçmiş təmas xətti üzrə təsəvvür etməkdən əl çəkməlidir
Bakı, 25 may, AZƏRTAC
Cənubi Qafqazdakı vəziyyətin əsas üstünlüklərindən biri də budur ki, Azərbaycan və Rusiya prezidentləri, Ermənistan baş nazirinin imzaladığı 10 noyabr Bəyanatı faktiki sülh müqaviləsinin bağlanması üçün əsas bazadır. Eyni zamanda, rəsmi Bakı sülh razılaşması üzərində işə başlamağa hazır olduğunu, istənilən potensial hərbi qarşıdurma riskinin minimuma endirilməsi və ya aradan qaldırılması üçün belə razılaşmaya ehtiyac olduğunu dəfələrlə bəyan edib, hətta konkret təkliflər irəli sürüb. Azərbaycanın bu istiqamətdə Ermənistan tərəfini humanitar, iqtisadi və kommunikasiya layihələrində iştiraka dəvətini xüsusi qeyd etməliyik.
Bunu AZƏRTAC-a açıqlamasında Milli Məclisin deputatı Könül Nurullayeva deyib.
Deputat vurğulayıb ki, Azərbaycan Prezidenti bütün beynəlxalq platformalarda ölkəmizin mövqeyini açıq şəkildə bəyan edir. Lakin Ermənistan hələ də məsələyə adekvat yanaşma sərgiləməyib. Halbuki, sülh müqaviləsi və Ermənistanın Azərbaycanın ərazi bütövlüyünü tanıması, əslində, bu ölkənin iqtisadi böhrandan çıxmasını təmin edəcək. Çünki nəticə etibarilə söhbət Cənubi Qafqaz regionunda sabitliyin və təhlükəsizliyin təmin edilməsindən gedir.
Ermənistanın sağlam yanaşma sərgiləmədiyi məsələlərdən birinin də sərhədlə bağlı olduğunu deyən K.Nurullayeva qeyd edib: “Təəssüf ki, Ermənistan işğal dövründə sərhəd anlayışını qoşunların təmas xətti üzrə təsəvvür edib. Faktiki Ermənistanın işğal siyasəti səbəbindən 30 il ərzində iki ölkə arasında sərhədlərin delimitasiyası mümkün olmayıb. Lakin hazırkı dövrdə yaranmış yeni reallıqdan çıxış etmək əsas şərtdir. Çünki bu reallıqların əsasında beynəlxalq hüquq amili dayanır.
Sərhədlər SSRİ dövründə respublikaların sərhədlərini müəyyən edən xəritə əsasında həyata keçirilməlidir. İndiki məqamda beynəlxalq qurumlar, xüsusilə də BMT, ATƏT və digər təşkilatlar sülh müqaviləsinin imzalanması və sərhədlərin delimitasiyasına dəstək verməlidirlər. Bundan sonra təbii ki, bölgədə inteqrasiya və əməkdaşlıq mühiti formalaşacaq”.
Deputat diqqətə çatdırıb ki, Azərbaycanın iqtisadi potensialı, həyata keçirilən qlobal enerji və nəqliyyat layihələri regionun rifahının reallaşdırılmasına tam şərait yaradır. “Ermənistandan isə tələb olunan yalnız siyasi iradədir. Azərbaycan Prezidentinin də söylədiyi kimi, indi Cənubi Qafqazda inkişaf Ermənistanın siyasi iradəsindən və gündəliyindən asılıdır. Bu həssas dövrdə təbii ki, beynəlxalq təşkilatların da üzərinə böyük missiya düşür. Bu təsisatların əsas missiyası tərəflər arasında etimad mühitinin gücləndirilməsinə töhfə vermək və sülh müqaviləsinin imzalanmasını təşviq etmək olmalıdır”, - deyə deputat vurğulayıb.
Bölmənin digər xəbərləri
