SİYASƏT
Deputat: Geri qayıdış öz ata-baba yurdundan çıxarılan azərbaycanlıların təməl hüququdur
![Deputat: Geri qayıdış öz ata-baba yurdundan çıxarılan azərbaycanlıların təməl hüququdur](/files/2023/3/1200x630/17017663724817627167_1200x630.jpg)
Bakı, 5 dekabr, AZƏRTAC
Qərbi Azərbaycan İcması tərəfindən təşkil olunan “Ermənistandan didərgin salınmış azərbaycanlıların təhlükəsiz şəkildə və ləyaqətlə geri qayıdışını təmin etmək: Qlobal kontekst və ədalətli həll” mövzusunda beynəlxalq konfrans çərçivəsində İcmanın Gənclər Birliyi sədrinin müavini, Milli Məclisin deputatı Kamal Cəfərov Albaniyanın Tirana Jurnalistika Mükəmməllik Mərkəzinin icraçı direktoru Krisafi Ledion ilə görüşüb.
AZƏRTAC xəbər verir ki, görüşdə Kamal Cəfərov indiki Ermənistan ərazisindən 300 minə yaxın Qərbi azərbaycanlının çıxarılmasının və onların hələ də geri qayıda bilməməsinin beynəlxalq norma və prinsiplərlə daban-dabana zidd olduğunu qeyd edib. O vurğulayıb ki, geri qayıdış öz ata-baba yurdundan çıxarılan azərbaycanlıların təməl hüququdur.
Krisafi Ledion öz növbəsində dünya ictimaiyyətinin bu ədalətsizliyə göz yummamalı olduğunu, beynəlxalq təşkilat və qurumlarda bu istiqamətdə müzakirələrin mümkün qədər çox aparılmasına dünya birliyi tərəfindən şəraitin yaradılmasının vacibliyini vurğulayıb.