Deputat: Moskva Bəyannaməsi Azərbaycanla Rusiya arasında əməkdaşlıqda yeni üfüqlər açır
Bakı, 23 fevral, AZƏRTAC
Azərbaycan və Rusiyanın imzaladıqları müttəfiqlik haqqında Bəyannamə iki ölkə arasında formalaşmış münasibətlərin möhkəmləndirilməsi və yeni müstəviyə çıxarılması baxımından xüsusi əhəmiyyət daşıyır. Bu Bəyannamədə Azərbaycanla Rusiya arasında əməkdaşlığın inkişaf etdirilməsi məqsədilə bu günə qədər imzalanmış bütün strateji sənədlərdə nəzərdə tutulan razılaşmaları özündə ehtiva edir və müasir dövrün çağırışlarını özündə əks etdirən yeni maddələrin icrası nəzərdə tutulur.
Bu fikirləri AZƏRTAC-a açıqlamasında Milli Məclisin deputatı Azər Badamov deyib.
O bildirib ki, Bəyannamənin birinci maddəsində qeyd olunduğu kimi, Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar. Bu maddə Rusiya-Azərbaycan münasibətlərinin əsasını təşkil edir və Qarabağda yaşayan ermənilərin gələcəyi ilə bağlı bəzi dairələrin xam xəyallarına nöqtə qoyulması deməkdir. Belə ki, Rusiya və Azərbaycan ölkələrin ərazi bütövlüyünə və dövlət müstəqilliyinə hörmətlə yanaşır və hər hansı bir təhdid yaranarsa, qarşılıqlı dəstəklənməyə öhdəlik götürürlər.
"Qırx üç maddədən ibarət Bəyannamədə maddələrin 50 faizi təhlükəsizlik və hərbi əməkdaşlıq məsələlərinə həsr olunub. Yəni, bu məsələlərin müttəfiqlik Bəyannaməsində əks olunması Rusiyanın özü üçün də zərurətdən irəli gəlir. Çünki Rusiya nə qədər böyük ölkə olsa da, onun üçün kifayət qədər xarici təhdidlər mövcuddur. Bəyannamədə ölkələr arasında hərbi sahədə əməkdaşlığın genişləndirilməsi, hərbi sənayenin inkişaf etdirilməsi və lazım gələrsə, bir-birinin dəstəklənməsi məsələləri də əks olunub.
Bəyannamənin digər hissəsi isə iqtisadi, mədəni, humanitar əməkdaşlığının genişləndirilməsi məqsədilə yeni tədbirlərin icrasını nəzərdə tutur", - deyə deputat qeyd edib.
A. Badamov vurğulayıb ki, ölkələrimiz arası iqtisadi əməkdaşlıq inkişaf dövrünü yaşayır. 2021-ci ildə ölkələrimiz arası ticarət dövriyyəsi 16 faiz artıb. Bu gün Rusiyanın bir çox şirkətləri işğaldan azad edilmiş ərazilərimizin yenidən qurulması və bərpası işlərində iştirak etmək istədiklərini bildirirlər. Bu baxımdan Bəyannamənin müvafiq maddələri qarşılıqlı investisiyaların yatırılması və əməkdaşlıq mühitinin genişləndirilməsinə yeni imkanlar açacaq. Sənədin vacib maddələrdən biri də bank sahəsində əməkdaşlığın genişdirilməsinin nəzərdə tutulmasıdır. Yəni, həmin maddədə qeyd olunur ki, tərəflər qarşılıqlı hesablaşmalarda milli valyutalardan istifadəyə, bank kartlarına birgə xidmət daxil olmaqla ödəniş sistemlərinin qarşılıqlı uyğunluğuna, eləcə də iki ölkənin bankları arasında birbaşa müxbir münasibətlərin inkişaf etdirilməsinə imkan yaradacaqlar. Bu maddə ölkələrimiz arasında maliyyə əməliyyatların həyata keçirilməsində milli valyutalarımızın rolunu artıracaq və milli iqtisadiyyatlarımızı xarici valyutaların yaratdığı təhdidlərdən qorunmasına xidmət edəcək.
Mili Məclisin deputatı əlavə edib ki, Azərbaycanla Rusiya arasında istifadə olunmamış iqtisadi potensial çox böyükdür. Bu potensial sənayedə, enerji sahəsinin inkişafında, atom enerjisindən dinc məqsədlər üçün istifadədə, kənd təsərrüfatında, informasiya kommunikasiyalarının inkişaf etdirilməsində, tranzit-nəqliyyat sektorunun səmərəliliyin artırılmasında, yeni investisiyaların yatırılmasında və digər sahələrin realizə olunmasını sürətləndirəcək. Bu potensialın realizəsini daha da dərinləşdirmək məqsədilə Azərbaycanla Rusiyanın subyektləri arasında da əməkdaşlıq imkanları genişləndiriləcək. Bəyanatda nəzərdə tutulan maddələrdən biri də Rusiya və Azərbaycan parlamentlərinin arasındakı əməkdaşlığını dərinləşdirməkdir. Düşünürəm ki, bu maddə ölkələrimiz arasındakı münasibətlərin möhkəmlənməsində parlament diplomatiyasının rolunu artıracaq və beynəlxalq təşkilatlarda mövqelərimizin möhkəmlənməsinə töhfəsini verəcək. Rusiyanın Azərbaycanla imzalandığı müttəfiqlik haqqında Bəyannamə çox ciddi sənəddir. Bu, həm ölkələrimiz arasında əməkdaşlıqda yeni üfüqlər açır, həm də qarşılıqlı məsuliyyət yaradır. Bu sənəd suveren dövlətlərimizin müstəqilliklərinə hörmət edilməklə əməkdaşlığın inkişafına və təhlükəsizliyin təmin olunmasına yeni təkan verəcək.
Bölmənin digər xəbərləri
