Deputat: Qarabağ Dirçəliş Fondunun fəaliyyəti bu bölgənin dirçəlməsi istiqamətində işlərin sürətləndirilməsinə təkan verəcək
Bakı, 8 yanvar, AZƏRTAC
Müzəffər Ali Baş Komandanımız İlham Əliyevin rəhbərliyi ilə rəşadətli Ordumuz 44 günlük Vətən müharibəsi nəticəsində bizi 30 ilə yaxın həsrətlə gözlədiyimiz Qarabağ torpaqlarına qovuşdurdu. Hazırda işğaldan azad edilmiş torpaqların yenidən qurulması qarşımızda duran ən mühüm məsələlərdən biridir. Sevindirici haldır ki, dövlətimiz tərəfindən Qarabağda yenidənqurma işlərinə başlanılıb. Suqovuşana yol çəkilib, Füzuli-Şuşa yolu müasir standartlara uyğun inşa edilir. Digər kommunal xətlərin bərpası istiqamətində zəruri işlər həyata keçirilir.
Prezident İlham Əliyevin tapşırığı ilə bu işlərin həyata keçirilməsi üçün Əlaqələndirmə Qərargahı yaradılıb və bütün aidiyyəti dövlət strukturları Qarabağda aparılacaq işlərə cəlb olunub. Amma bununla yanaşı, ölkə vətəndaşları, eləcə də xaricdə yaşayan soydaşlarımız, iş adamları Qarabağın quruculuğu prosesinə iştirak etmək istədiklərini hər fürsətdə ifadə edirlər. Bu gün hər kəsin ən böyük arzusu Qarabağın dirçəlməsi prosesinə töhfə verməkdir. Bu baxımdan, Prezident İlham Əliyevin təşəbbüsü ilə Qarabağ Dirçəliş Fondunun yaradılması xalqımız və dövlətimiz üçün mühüm tarixi hadisədir.
Bu fikirləri AZƏRTAC-a açıqlamasında Milli Məclisin deputatı, Qarabağ Dirçəliş Fondunun Müşahidə Şurasının üzvü Fatma Yıldırım deyib.
F.Yıldırım bildirib ki, hər birimiz təcavüzkar Ermənistanın 30 ilə yaxın müddət ərzində işğal altında saxladığı torpaqlarımızda əsl vandalizm aktı törətdiyinin, bütün şəhər və kəndlərimizin tamamilə dağıdıldığının şahidi olduq. Düşmən tarixi abidələrimizi, məscidlərimizi məhv edib, bölgənin ekologiyasına çox ciddi ziyan vurub. Bu səbəbdən bizi qarşıda çox vacib bərpa-yenidənqurma işləri gözləyir. Hazırda işğaldan azad edilmiş bir çox şəhərlərimiz yerlə-yeksan olunduğu üçün, sözün əsl mənasında, müasir dövrün tələblərinə uyğun yenidən qurulmalıdır. Bu istiqamətdə artıq şəhərlərin yeni baş planları hazırlanır.
Deputatın fikrincə, Qarabağ Dirçəliş Fondu işğaldan azad edilmiş ərazilərinin bərpası və yenidən qurulması, habelə güclü iqtisadiyyat və yüksək rifaha malik bölgəyə çevrilməsi istiqamətində həyata keçirilən layihələrə maliyyə dəstəyi göstərəcək, eyni zamanda, dövlət-özəl sektor tərəfdaşlığının inkişafını təmin edəcək, yerli və xarici sərmayələrin cəlb olunması üçün zəruri təşviqat işləri aparılacaq.
“İnanıram ki, bu fondun fəaliyyəti, həmçinin həmrəyliyimizin rəmzinə çevriləcək. Necə ki, müharibə dövründə xalqımız bir yumruq kimi birləşərək böyük Zəfər qazandı, eləcə də Qarabağın dirçəlməsi istiqamətində işlərin sürətləndirilməsinə təkan verəcəkdir. Əminəm ki, bu gün hər kəs özünü qarabağlı hesab edir və bu müqəddəs işə töhfə vermək istəyir. Bunu özlərinə fəxr hesab edirlər”, - deyən Fatma Yıldırım bildirib ki, xaricdə yaşayan soydaşlarımız da Qarabağın quruculuğuna töhfə vermək istəklərini ifadə edirlər. O deyib: “Biz bilirik ki, xaricdə yaşayan çox sayda azərbaycanlı iş adamı var. Bu baxımdan, onların da prosesdə iştirakı çox yaxşı olar. Eyni zamanda, düşünürəm ki, xaricdəki soydaşlarımız Qarabağda yenidənqurma işlərinə sərmayələrin cəlb olunması istiqamətində təşviqat işlərində fəal iştirak etməlidirlər. Çünki zəngin Qarabağ torpaqlarında çoxşaxəli yatırımlar üçün əlverişli şərait yaradılacaq. Düşünürəm ki, Azərbaycan bu ildən etibarən yeni inkişaf mərhələsinə qədəm qoyur. Bu bölgədə aparılan quruculuq, bərpa işləri bütövlükdə xalqımızın rifahının yaxşılaşmasına və ölkəmizin daha da inkişafına gətirib çıxacaq”.
Bölmənin digər xəbərləri
