Deputat: Reket jurnalistikasına və bu sahədə neqativ hallara qarşı mübarizə gücləndirilməlidir
Bakı, 15 dekabr, AZƏRTAC
Kütləvi informasiya vasitələri haqqında qanun dövlət və media münasibətlərini hüquqi müstəvidə tənzimləyə biləcək bir prosesdir. Həmçinin müasir çağırışlara uyğun hüquqi normativ bazanın yaradılmasına da imkan verə bilər. Həm də bu qanun media sahəsində keçirilən islahatların tərkib hissəsi kimi anlaşılır. Bununla yanaşı, media sahəsinin təkmil şəkildə fəaliyyət göstərməsinə və inkişafına da töhfə verəcəkdir. Qanunda dəqiq şəkildə dövlətin və media sahəsində çalışanların hüquqları, vəzifələri müəyyənləşdirilib. Bu, həm də ölkədə informasiya təhlükəsizliyinin qorunmasının, təxribatçı və neqativ informasiyaların ölkəmizin media məkanına daxil olmasının qarşısının alınmasına töhfə verəcəkdir. Qeyd etməliyik ki, hazırda bu sahədə müəyyən qədər pərakəndəlik var. Buna görə də qanun layihəsi qüvvəyə mindikdən sonra media sahəsində fəaliyyət daha məsuliyyətlə yanaşmanı tələb edəcək. Qanunda müəyyən dairələrin qeyd etdiyi kimi məhdudiyyətlər qoyulmur, amma jurnalistika peşəsinə daha məsuliyyətli yanaşmanı tələb edir. Hazırda bu sahədə çalışan bəzi jurnalistlərin fəaliyyətlərində qeyri peşəkarlıq göründüyü üçün qanun layihəsi bu istiqamətdə vacib rol alır. Qanun layihəsində jurnalist vəsiqəsi verilmiş şəxslərə imtiyazlar da nəzərdə tutulub. Bu imtiyazlar və güzəştlər jurnalistika sahəsində rəqabət mühitinin formalaşmasına, ən əsası bu sektorda peşəkarlığın və məsuliyyətin artmasına töhfə verəcəkdir.
Bunu AZƏRTAC-a açıqlamasında Milli Məclisin deputatı Azər Badamov bildirib.
Peşəkar jurnalistlərlə çalışan media qurumlarının yaydığı informasiyaların daha dolğun və obyektiv olduğunu qeyd edən deputat deyib: “Reket jurnalistikasına və bu sahədə neqativ hallara qarşı mübarizə gücləndirilməlidir. Həmçinin media qurumları əməkdaşlarının yaydıqları informasiyalara görə məsuliyyət daşımalı, o cümlədən jurnalistlər də hər bir informasiyanın cəmiyyətə təqdim olunmasındakı məsuliyyətini dərk etməlidir. Çox təəssüf ki, bəzi hallarda şəxslərin peşə fəaliyyətlərinə, imicinə, şərəf və ləyaqətinə təsir edən informasiyaların da yayımlandığının şahidi oluruq. Müzakirə etdiyimiz qanun layihəsinin bütün bu məsələlərin tənzimlənməsinə imkan verəcəyini düşünürəm”.
Azər Badamov bildirib ki, qanun layihəsində media reyestrinin yaradılması, həmçinin buradan çıxarılma halları, bundan əlavə buraya daxil edilmiş şəxslər üçün güzəştlər və imtiyazların nəzərdə tutulmasını, tələblərin müəyyənləşməsini çox düzgün hesab edirəm. Media reyestri media sahəsində çalışanların fəaliyyətinin güzgüsü ola bilər. Burada hər bir hüquqi və fiziki şəxsin fəaliyyəti haqqında məlumatlar toplanacaq. Media haqqında qanun, həmçinin bura daxil olan şəxsin bir növ xarakteristikasını özündə əks etdirməklə perspektivinin müəyyənləşməsində rol oynayacağını düşünürəm. Bu da media sahəsində obyektivliyin və şəffaflığın təmin olunmasına yol açacaq. Media haqqında qanun reyestrdən qeydiyyatdan keçmiş media mənsublarının maarifləndirilməsi, bu sahədə savadlılığın artırılması və müəyyən dövlət dəstəyi proqramlarından yararlanmasına imkan verəcəkdir.
Ümumiyyətlə, bu qanun layihəsi Azərbaycanda KİV-in fəaliyyətini yeni müstəviyə çıxarmaq üçün önəmli addımdır. Burada xəbərlərin verilməsində istinad qaydaları və həm də yanlış xəbərlərlə bağlı təkzib qaydaları da müəyyənləşir. Bu da onlayn mediada xəbərlərin istinad edilmədən bir-birindən köçürülməsinin qarşısının alınmasına, həm də jurnalistlərin daha araşdırmaçı və ilkin mənbədən xəbər əldə etməsinə meyilliyi artıracaqdır. Təbii ki, belə yanaşma KİV-də yayımlanan materialların keyfiyyət və kəmiyyətində dəyişiklik edəcək. Hazırda cəmiyyətdə geniş müzakirə edilən media haqqında qanunun bu günün tələbi olduğunu düşünürəm. İqtisadiyyatın bütün sahələrində həyata keçirilən islahatlar media sahəsinə də sirayət olunmalı idi. Təbii ki, islahatlar media sahəsində daha təkmil formada fəaliyyətin göstərilməsini gündəmə gətirəcəkdir.
Bölmənin digər xəbərləri
