SİYASƏT
Deputat: Türk birliyinin möhkəmlənməsi Azərbaycan dövlətinin xarici siyasətində prioritetdir
Bakı, 28 noyabr, AZƏRTAC
Azərbaycan Şimali Kipr və Mərkəzi Asiya dövlətləri arasında dialoqun təşviqində, siyasi və iqtisadi boşluqların aradan qaldırılmasında mühüm rol oynamaqdadır. Azərbaycan Respublikası türk dövlətləri arasında iqtisadi əlaqələrin gücləndirilməsi, siyasi müstəvidə məsləhətləşmələrin aparılması, təhlükəsizlik sahəsində qarşılıqlı yardımların göstərilməsi ilə Türk birliyinin möhkəmlənməsinə hər zaman töhfə verib və bu prinsiplər dövlətimizin xarici siyasətində prioritetdir.
AZƏRTAC xəbər verir ki, bu sözləri Milli Məclisin Azərbaycan-Şimali Kipr Türk Respublikası (ŞKTR) parlamentlərarası əlaqələr üzrə İşçi qrupunun sədri Cavanşir Feyziyev ŞKTR-ın müstəqilliyinin 41-ci ildönümü münasibətilə keçirilən tədbirdə söyləyib.
O vurğulayıb ki, ölkələrimiz arasında son illər sürətlə genişlənən ikitərəfli əlaqələr müxtəlif sahələrə, o cümlədən təhsilə mühüm töhfələr verməkdədir. Hazırda 1000-ə yaxın azərbaycanlı tələbə Şimali Kiprin beynəlxalq standartlara cavab verən universitetlərində təhsillərini davam etdirir. Eyni zamanda, bir çox azərbaycanlı təhsil işçisi ŞKTR-ın akademik müəssisələrində uğurla çalışır.
“Qarşıdakı illərdə professor-müəllim heyətlərinin mübadiləsi nəzərdə tutulur ki, bu da münasibətlərimizin daha da dərinləşməsinə təkan verəcək”, - deyə C.Feyziyev əlavə edib.
