Bakı, 12 yanvar, AZƏRTAC

Qırx dörd gün davam edən Vətən müharibəsində möhtəşəm Qələbə qazanaraq ərazi bütövlüyünü təmin edən Azərbaycan yeni tarix yazdı. Xalqımız ölkə Prezidenti, Müzəffər Ali Baş Komandan İlham Əliyevin ətrafında dəmir yumruq kimi birləşərək işğala son qoydu, qarşıdakı illər üçün hədəflərin müəyyənləşdirilməsinə, Azərbaycanın regionda və dünyada yeni reallıqlar yaratmasına yol açdı. Dövlətimizin başçısı İlham Əliyevin sədrliyi ilə videoformatda keçirilən 2020-ci ilin yekunlarına həsr olunan müşavirədə ölkə Prezidenti Zəfərimizi şərtləndirən amillərə diqqət yönəltməklə yanaşı, Qələbəmizi həzm edə bilməyən “sapı özümüzdən olan baltalara” tarixi unutmamağa dair sərt mesajlarını çatdırdı”.

AZƏRTAC xəbər verir ki, bu fikirləri Milli Məclisin deputatı Malik Həsənov söyləyib.

Zəfərimizin harada yaşamasından asılı olmayaraq, bütün dünya azərbaycanlılarında böyük qürur hissi yaratdığını bildirən M.Həsənov qeyd edib: “Çünki bu Qələbə milli qürurumuzu özümüzə qaytardı. Azərbaycan xalqı nə qədər məğrur, yenilməz xalq olduğunu dünyaya nümayiş etdirdi. “Düşmən dəyirmanına su tökməyi” fəaliyyətlərinin əsas istiqaməti kimi qəbul edən antimilli ünsürlər Zəfəri böyük qısqanclıqla qarşılamaqla bir daha ermənipərəst mövqelərini ortaya qoydular. İllərdir ictimai fikri çaşdırmaq, hakimiyyətə qarşı inamsızlıq yaratmaq üçün Ermənistan-Azərbaycan Dağlıq Qarabağ münaqişəsindən bir vasitə kimi istifadə edən radikal qüvvələrə gələcəyə keçmişləri ilə addımladıqlarını xatırlatmaq istərdik. AXC-Müsavat cütlüyünün bir illik hakimiyyəti dövründə ölkəni hansı duruma saldığı, torpaqlarımızın işğalına geniş imkanlar yaratdığı tariximizin qara səhifəsi kimi yaddaşlardadır. Düşünürük ki, torpaqlarımızın işğal altına düşməsinin səbəbkarları bu Qələbədən daha çox sevinməli və Müzəffər Ali Baş Komandana, güclü, qüdrətli Ordumuza minnətdar olmalıdırlar. Artıq üzərilərində illərdir qara ləkə kimi qalan Dağlıq Qarabağ problemi öz müsbət həllini tapdı. Dövlət, Vətən, xalq anlayışlarını dərk etməyən, şəxsi ambisiyalarını dövlət maraqlarından üstün tutan daxili bədxahlarımız üçün Zəfərin sevinc deyil, kədər hissi yaratması başadüşüləndir. Xain, satqın ünsürlər daim ermənilər üçün göz yaşı tökür, onları “yazıq”, “məzlum” obrazda təqdim edirlər”.

“200 illik tarixi vərəqləməyə ehtiyac yoxdur” deyən deputat bildirib ki, antimilli ünsürlərin çox da uzaq olmayan tarixdə - 44 günlük Vətən müharibəsi dövründə Ermənistan silahlı qüvvələrinin döyüş meydanında məğlubiyyətlərini həzm edə bilmədikləri üçün üç dəfə atəşkəsi pozaraq mülki əhalinin həlak olmasına, yaralanmasına, böyük dağıntılara səbəb olan terror aktlarını törətməsini yada salması kifayətdir. Belə faşist, terrorçu siyasət həyata keçirən bir ölkəni, xalqı müdafiə etməyin özü vəhşilik, insanlıqdan uzaq olmaqdır.

İkinci Qarabağ müharibəsində müxalifətli-iqtidarlı 50-dən çox siyasi partiya bu müqəddəs yolda dövlətimizin başçısının, Müzəffər Ali Baş Komandanın yanında oldu, onun həyata keçirdiyi siyasəti dəstəklədi, Azərbaycana qazandırdığı Zəfər münasibətilə təşəkkürlərini bildirdi. “Tariximizin hər bir səhifəsi gənc nəslə çatdırılmalıdır. Azərbaycan gəncliyi bu gün ölkəmizin Qələbəsinə kölgə salmağa çalışanların yazdıqları biabırçı tarix haqqında dolğun məlumata malik olmalıdırlar. Tarix heç zaman unudulmur. Dövlətimizin başçısı İlham Əliyev qeyd etdiyi kimi, gənc nəsil Şuşanı, Laçını, Xocalını, Kəlbəcəri satanları, fərarilik edənləri, torpaqlarımızın itirilməsinə imkan yaradanları tanımalıdır”,- deyə M.Həsənov bildirib.

Deputat vurğulayıb ki, qalib ölkənin və Ordunun Müzəffər Ali Baş Komandanı İlham Əliyev videoformat şəklində keçirilən müşavirədə tarixi paralellər fonunda hər bir dövrün reallıqlarını, eyni zamanda, Vətən müharibəsində Azərbaycanın Qələbəsini qəbul etməyən ünsürlərin narahatlığının səbəblərini açıqladı. Ümumi fikir budur ki, Azərbaycan 30 il əvvəlki ölkə deyil. Torpaqlarımız azad edilib, Böyük Qayıdış, davamlı inkişaf prosesləri başlayır. Azərbaycanın qarşısında yeni imkanlar açılır. Bu reallıqlarımız “sapı özümüzdən olan baltalar”ın cəhdlərinə tutarlı cavabdır. Belələrindən nə gözləmək olar?