Dövlət Baytarlıq Xidmətində 20 Yanvar faciəsinin ildönümünə həsr edilmiş tədbir keçirilmişdir
Bakı, 16 yanvar (AZƏRTAC). Yanvarın 16-da Kənd Təsərrüfatı Nazirliyi yanında Dövlət Baytarlıq Xidmətində (DBX) 20 Yanvar faciəsinin 23-cü ildönümünə həsr olunmuş anım tədbiri keçirilmişdir.
Xidmətin mətbuat mərkəzindən AZƏRTAC-a bildirmişlər ki, əvvəlcə şəhidlərin əziz xatirəsi birdəqiqəlik sükutla yad edilmişdir.
Tədbiri açan DBX-nin rəisi Sialə Rüstəmova faciə haqqında ətraflı məlumat vermişdir. Bildirilmişdir ki, 20 Yanvar hadisələri, hər şeydən əvvəl, Azərbaycan xalqının milli oyanışından, azadlıq və müstəqillik mücadiləsindən xəbər verən tarixi bir gerçəklik idi. Azərbaycana bu hərbi müdaxilənin əsas zərbəsi milli azadlıq hərəkatını boğmaq, xalqımızı yenidən əsarət altında saxlamağa yönəlmişdi.
DBX-nin rəisi vurğulamışdır ki, faciədən bir gün sonra özünün və ailəsinin həyatı üçün təhlükələrə baxmayaraq, ümummilli lider Heydər Əliyev Azərbaycanın Moskvadakı daimi nümayəndəliyinə gələrək, doğma xalqının dərdinə şərik çıxmış, Qanlı Yanvar faciəsini törədənləri cəsarətlə lənətləmiş və hadisəyə siyasi-hüquqi qiymət verilməsini tələb etmişdir.
S.Rüstəmova ümummilli lider Heydər Əliyevin layiqli davamçısı Prezident İlham Əliyev tərəfindən şəhid ailələrinə göstərilən diqqət və qayğıdan ətraflı bəhs etmişdir.
Tədbirdə digər çıxış edənlər də 20 Yanvar faciəsindən ətraflı danışmış və bu faciənin dünya müstəvisində geniş işıqlandırılmasının vacibliyini önə çəkmişlər.
Bölmənin digər xəbərləri
