DÖVLƏT NEFT FONDU MÜŞAHİDƏ ŞURASININ NÖVBƏTİ İCLASI KECİRİLMİŞDİR
İclasda Fondun 2005-ci il üçün büdcəsində dəyişikliklərin aparılması, 2006-cı il üçün büdcə layihəsi və vəsaitlərinin idarə olunması siyasətinin təkmilləşdirilməsi ilə bağlı məsələlər müzakirə edilmişdir.
Heydər Əliyev adına Bakı-Tbilisi-Ceyhan əsas neft ixrac boru kəmərinin tikintisi ilə bağlı cari ildə artmış xərclərlə əlaqədar və Azərbaycan Respublikası hökumətinin bu layihədə iştirak payının maliyyələşdirilməsinin Neft Fondunun vəsaiti hesabına həyata keçirildiyi nəzərə alınaraq, Dövlət Neft Fondunun 2005-ci il üzrə büdcə xərcləri daha 100 milyard manat artırıldığı üçün Milli Məclis tərəfindən icmal dövlət büdcəsinə müvafiq dəyişikliklərin edilməsi və bu dəyişikliklərin “Azərbaycan Respublikasının 2005-ci il dövlət büdcəsi haqqında” Qanuna dəyişikliklər və əlavələr edilməsi barədə” 21 iyun 2005-ci il tarixli Azərbaycan Respublikasının Qanunu ilə təsdiq olunması Müşahidə Şurası tərəfindən müzakirə edilmişdir. Şura Dövlət Neft Fondunun 2005-ci il üzrə büdcə xərclərinin 105 milyard manatdan 205 milyard manata qədər artırılmasını məqsədəuyğun hesab etmiş və Azərbaycan Respublikası Dövlət Neft Fondunun 2005-ci il üçün büdcəsində dəyişikliklərin edilməsi barədə Fərman layihəsinin təsdiq edilmək üçün Azərbaycan Respublikasının Prezidentinə təqdim olunmasını tövsiyə etmişdir.
Müşahidə Şurasının iclasında Neft Fondunun “Büdcə sistemi haqqında” Azərbaycan Respublikası Qanuna əsasən icmal dövlət büdcəsinə daxil edilmiş gəlir və xərclərinin Azərbaycan Respublikasının Milli Məclisi tərəfindən təsdiq edildiyi, habelə Fondun idarə olunması ilə bağlı icmal büdcəyə daxil edilməyən xərclərə dair Dövlət Neft Fondunun icraçı direktoru tərəfindən təqdim edilmiş məlumatlar nəzərə alınaraq, Dövlət Neft Fondunun 2006-cı il büdcəsinin gəlirlərinin 807842,6 min yeni Azərbaycan manatı (AYM), xərclərinin 954287,7 AYM, o cümlədən Fondun idarə edilməsi ilə bağlı xərclərin 3976,7 min AYM məbləğində müəyyən edilməsi məqsədəuyğun sayılmışdır. Dövlət Neft Fondunun 2006-cı il büdcə layihəsi, o cümlədən Neft Fondunun vəsaitinin istifadə edilməsinin əsas istiqamətləri (investisiya siyasəti daxil olmaqla) və Neft Fondunun idarə edilməsi ilə bağlı illik xərclər smetasının layihələri məqbul sayılmış və təsdiq olunmaq üçün Azərbaycan Respublikasının Prezidentinə təqdim olunması tövsiyə edilmişdir.
İclasda Dövlət Neft Fondunun icraçı direktorunun Fondun investisiya siyasətinin təkmilləşdirilməsinə dair təklifləri dinlənilmiş və təkliflərin daha geniş formatda təqdimatının keçirilməsi məqsədəuyğun hesab edilmişdir. Müşahidə Şurasının iclasında, həmçinin Neft Fondunun fəaliyyətinə dair digər məsələlər də müzakirə olunmuşdur.
Baş nazir A.Rasizadə yenidən Dövlət Neft Fondu Müşahidə Şurasının sədri seçilmişdir.
Bölmənin digər xəbərləri
