DÖVLƏT NEFT FONDUNUN MÜŞAHİDƏ ŞURASININ İCLASI KEÇİRİLMİŞDİR
AZƏRTAC xəbər verir ki, iyunun 27-də Azərbaycan Respublikası Dövlət Neft Fondu (ARDNF) Müşahidə Şurasının növbəti iclası keçirilmişdir.
Azərbaycan Respublikasının Baş naziri, Dövlət Neft Fondunun Müşahidə Şurasının sədri Artur Rasizadənin sədrliyi ilə keçirilən iclasda Fondun 2007-ci ildə fəaliyyəti haqqında illik hesabatı, maliyyə fəaliyyətinin auditinin nəticələri, ARDNF-in 2007-ci il büdcəsinin icrası, Fondun 2008-ci il büdcəsində dəyişikliklərin edilməsi məsələlərinə baxılmışdır.
Müşahidə Şurası Neft Fondunun icraçı direktorunun təqdim etdiyi 2007-ci ildə fəaliyyəti haqqında illik hesabatına, 2007-ci ildə maliyyə fəaliyyəti haqqında müstəqil auditorun (“Deloyt end Tuş” şirkətinin) hesabatına baxaraq onları məqbul hesab etmiş və Fondun 2007-ci il büdcəsinin icrası layihəsini təsdiq olunmaq üçün Azərbaycan Prezidentinə təqdim etmək barədə qərar qəbul etmişdir.
Müşahidə Şurası Fondun 2008-ci il büdcəsinə təqdim olunmuş dəyişiklikləri məqbul hesab etmiş və həmin dəyişikliklərin təsdiq olunmaq üçün Azərbaycan Prezidentinə təqdim olunmasını qərara almışdır.
İclasda Baş nazir A.Rasizadə 2008-ci il üzrə Dövlət Neft Fondunun Müşahidə Şurasının sədri seçilmişdir.
Bölmənin digər xəbərləri
