SİYASƏT
Dövlət qulluğuna qəbulla bağlı elan edilmiş müsabiqələrin test imtahanı mərhələsi davam edir
Bakı, 17 iyun (AZƏRTAC). Azərbaycan Respublikasının Prezidenti yanında Dövlət Qulluğu Məsələləri üzrə Komissiya bu il aprelin 1, 23, 30-da, mayın 20-də və iyunun 13-də 89 dövlət orqanında inzibati vəzifələrin beşinci - yeddinci təsnifatlarına uyğun olan 941 vakant dövlət qulluğu vəzifəsinin tutulması üçün müsabiqə elan etmişdir.
Komissiyadan AZƏRTAC-a bildirmişlər ki, aprelin 1, 23 və 30-da elan edilmiş müsabiqələr üzrə artıq qeydiyyat başa çatmışdır. Mayın 20-də və iyunun 13-də elan edilmiş müsabiqələr üzrə isə qeydiyyat müvafiq olaraq iyunun 18-dən iyulun 14-dək davam edəcəkdir.
Müsabiqələrdə iştirak etmək üçün Komissiyada indiyədək 6362 namizəd qeydə alınmışdır.
İyunun 17-dək 4132 namizədlə müsabiqənin test imtahanı mərhələsi keçirilmişdir. Onlardan 1302 nəfəri imtahanda iştirak etməmişdir. Test imtahanı mərhələsində iştirak edən 2830 namizəddən 913-ü qanunvericiliyə müvafiq olaraq müsabiqənin ilk mərhələsini uğurla başa vurmuşdur. Test mərhələsini uğurla başa vuran namizədlərdən 338 nəfəri 5-ci təsnifat inzibati vəzifələr, 357 nəfəri 6 və ya 7-ci təsnifat inzibati vəzifələr üzrə keçid balını toplamışdır. Namizədlərdən 218 nəfəri 5-ci təsnifat inzibati vəzifələrə iddia etsə də bu vəzifələr üzrə keçid balını toplamamış, lakin 6 və ya 7-ci təsnifat inzibati vəzifələr üzrə keçid balını toplamışdır.
Hər bir namizədə test imtahanını bitirdiyi an nəticələri əks etdirən arayış təqdim edilmiş, eyni zamanda, nəticələr Komissiyanın rəsmi internet saytında da yerləşdirilmişdir.
Müsabiqənin test imtahanı mərhələsi 21 dövlət orqanı üzrə başa çatmışdır.