DÖVLƏT TORPAQ VƏ XƏRİTƏÇƏKMƏ KOMİTƏSİ ÖTƏN İLƏ YEKUN VURMUŞDUR
AZƏRTAC xəbər verir ki, Dövlət Torpaq və Xəritəçəkmə Komitəsində ötən ildə görülən və 2005-ci il görüləcək işlər barədə yekun iclas keçirilmişdir.
İclası komitənin sədri Qərib Məmmədov açaraq, müasir Azərbaycan dövlətinin qurucusu, ümummilli liderimiz Heydər Əliyevin iqtisadiyyatımızın inkişafındakı xidmətlərindən danışmış, ulu öndərimizin müəyyənləşdirdiyi siyasi xəttin Prezident İlham Əliyev tərəfindən uğurla davam etdirildiyini bildirmişdir.
Komitə sədri məlumat vermişdir ki, ötən dövrlərdə torpaq islahatlarının birinci mərhələsi uğurla başa çatdırılmışdır. Həmin mərhələdə respublikamızda mövcud olmuş 2031 təsərrüfat (kolxoz və sovxozlar) ləğv edilərək, onların əkinə yararlı münbit torpaqları əhaliyə paylanılmışdır. İşğal olunmuş rayonlarımız istisna olmaqla, bu mərhələdə ölkəmizdə torpaq payı almaq hüququ olan 872 min 855 ailədən 867 min 774-nə torpaq verilmiş, ölkədə torpaq islahatı 99,3 faiz yerinə yetirilmişdir.
Ötən il 450 yaşayış məntəqəsində vətəndaşların qanuni istifadəsində olan həyatyanı sahələrə mülkiyyət hüququnu təsdiq edən şəhadətnamələr hazırlanmış və 158 min 120 ailəyə verilmişdir.
Natiq vurğulamışdır ki, Prezident İlham Əliyevin “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” Fərmana uyğun olaraq, regionların iqtisadi inkişafı sürətləndirilmişdir.
Komitə sədri uğurlarla bərabər, yol verilmiş nöqsanlardan da danışmış, qarşıda duran vəzifələrin layiqincə yerinə yetiriləcəyinə əminliyini ifadə etmişdir.
Bölmənin digər xəbərləri
