DÖVLƏT TORPAQ VƏ XƏRİTƏÇƏKMƏ KOMİTƏSİNDƏ ÜMUMMİLLİ LİDERİMİZ HEYDƏR ƏLİYEVİN BÜSTÜ AÇILMIŞDIR
AZƏRTAC xəbər verir ki, fevralın 2-də Dövlət Torpaq və Xəritəçəkmə Komitəsinin binasında xalqımızın ümummilli lideri Heydər Əliyevin büstü açılmışdır.
Komitənin sədri Qərib Məmmədov çıxış edərək dahi şəxsiyyət, dünya şöhrətli siyasi xadim, müstəqilliyimizin memarı Heydər Əliyevin hamıya örnək olan ömür yolundan, dövlətçiliyimizin inkişafında əvəzsiz xidmətlərindən danışmışdır.
Sədr qeyd etmişdir ki, xalqımızın yaşadığı çətin və məşəqqətli dövrlərdə ulu öndərimiz Heydər Əliyev təzyiqlərə baxmayaraq, həmişə Azərbaycanın müstəqilliyini özünün başlıca vəzifəsi hesab etmiş və daim ölkəmizin inkişafı, beynəlxalq miqyasda tanınması yolunda əzmlə mübarizə aparmışdır. Natiq məhz ulu öndərimizin hakimiyyətə qayıdışından sonra respublikada iqtisadiyyatın tənəzzülünə son qoyulduğunu, sənaye və kənd təsərrüfatında islahatların aparıldığını, ölkəmizin sürətlə inkişafı sahəsində böyük işlər görüldüyünü bir daha vurğulamışdır.
Qərib Məmmədov bildirmişdir ki, Azərbaycan xalqının böyük oğlunun xatirəsi respublikamızın müxtəlif yerlərində, ayrı-ayrı idarə və müəssisələrdə əbədiləşdirilmiş, heykəlləri ucaldılmış, büstləri qoyulmuşdur. Əslində o, hələ sağlığında bütün Azərbaycan vətəndaşlarının qəlbində öz abidəsini qoymuşdur.
Mərasimdə Milli Məclisin deputatları Asya Manafova, Mübariz Qurbanlı, Rəbiyyət Aslanova və başqaları çıxış edərək ümummilli liderimizin siyasi fəaliyyətindən, Azərbaycan xalqının xoşbəxt gələcəyi naminə gördüyü işlərdən danışmışlar.
Bölmənin digər xəbərləri
