Dünya Azərbaycanlılarının Həmrəylik Günü münasibətilə İsraildə tədbir keçirilib
Bakı, 30 dekabr, AZƏRTAC
İsraildəki Azərbaycan diasporunun əlaqələndirmə şurası Akko şəhərində yerləşən “İsraildə Azərbaycan Evi”ndə Dünya Azərbaycanlılarının Həmrəylik Gününə həsr olunan tədbir keçirib.
AZƏRTAC xəbər verir ki, əvvəlcə İsrailin və Azərbaycanın dövlət himnləri səsləndirilib. Tədbirə toplaşanlar Azərbaycanın müstəqilliyi və ərazi bütövlüyü uğrunda mübarizədə həlak olanların xatirəsini bir dəqiqəlik sükutla yad ediblər.
Bakı Beynəlxalq Multikulturalizm Mərkəzinin İsrail nümayəndəliyinin və “İsraildə Azərbaycan Evi”nin icraçı direktoru, beynəlxalq münasibətlər sahəsində tanınmış ekspert Arye Qut bildirib ki, azərbaycanlılar və Azərbaycandan köçüb gələn vətəndaşlar dünyanın hər bir ölkəsində Azərbaycan mədəniyyətinin, dilinin, adət-ənənələrinin və mentalitetinin layiqli daşıyıcıları olmalıdırlar.
Ekspert Dünya Azərbaycanlılarının Həmrəylik Gününün təsis edilməsi tarixi üzərində ətraflı dayanaraq diqqətə çatdırıb ki, dekabrın 31-i Azərbaycan xalqının ümummilli lideri Heydər Əliyevin təşəbbüsü ilə Dünya Azərbaycanlılarının Həmrəylik Günü kimi qeyd olunur. Arye Qut deyib: “Beynəlxalq əlaqələrin inkişafı, Azərbaycanın Cənubi Qafqazda güclü geosiyasi mərkəz kimi beynəlxalq nüfuzunun möhkəmlənməsi, dünyada azərbaycanlıların diaspor təşkilatlarının yaranması və möhkəmlənməsi, həmvətənlərin doğma yurdla əlaqələrinin inkişafı Azərbaycan rəhbərliyinin yürütdüyü siyasətin ayrılmaz hissəsidir. “İsraildə Azərbaycan Evi” humanitar xarakterli iri layihələrin həyata keçirilməsi vasitəsilə əsl və real Azərbaycan diaspor təşkilatına çevrilməyi qarşısına məqsəd qoyub.
Azərbaycan və yəhudi xalqlarının qarşılıqlı münasibətləri əsl və həqiqi dostluq nümunəsidir. Bu gün həm millətlərarası, həm dinlərarası münaqişələrin şölələndiyi bu qəddar dünyada Azərbaycan bütün konfessiyaların nümayəndələrinin dinc yanaşı yaşadığı sabitlik və rifah adasıdır. Bu gün güclü və müstəqil Azərbaycan çoxvektorlu xarici siyasəti uğurla həyata keçirir. Azərbaycan uğurlu geosiyasi və geoiqtisadi təşəbbüslər sayəsində regionun qüdrətli geosiyasi mərkəzinə və liderinə çevrilib, onun iştirakı və razılığı olmadan dünyanın bu regionunda heç bir siyasi, iqtisadi, nəqliyyat məsələsi həll oluna bilməz. İsrail və Azərbaycan arasında diplomatik münasibətlərin 27 illik tarixi ərzində yəhudi dövləti ilə əhalisinin əksəriyyətini müsəlmanların təşkil etdiyi dövlət arasında strateji münasibətlərin zəruriliyi və həyat qabiliyyəti sübut olunub.
İsrailli ekspert qeyd edib ki, Azərbaycan rəhbərliyi və şəxsən Prezident İlham Əliyev Azərbaycanda yaşayan bütün icmalara, o cümlədən yəhudi icmasına, sözün həqiqi mənasında, həssas və qayğıkeş diqqət göstərir. “Qədim Qırmızı Qəsəbə - İsrail hüdudlarından kənarda yəhudilərin yığcam yaşadıqları yeganə və nadir yerdir. Bu, Azərbaycanın əsl qürurudur. Sizin Qırmızı Qəsəbədə görə biləcəkləriniz Azərbaycanda dini konfessiyaların - müsəlman və yəhudilərin sıx əməkdaşlıq və tərəfdaşlığının nəticəsidir. Bu gün bizdə müxtəlif dinlərdən olan insanların dinc yanaşı yaşamasının və bir-birinə ehtiram göstərməsinin real və həqiqi nümunəsi var. Prezident İlham Əliyev dünyəvi dövlətə, tolerantlığa bağlılıq, Azərbaycanda yaşayan bütün konfessiyalara və xalqlara, o cümlədən yəhudilərə hörmətcil münasibət nümayiş etdirir”, - deyə Arye Qut bildirib.
“İsraildə Azərbaycan Evi”nin başçısı Şirin Nehamiya Mixaeli tədbir iştirakçılarını Dünya Azərbaycanlılarının Həmrəylik Günü bayramı münasibətilə təbrik edib. O qeyd edib ki, vaxtilə Azərbaycanda yaşamış vətəndaşların son 25-30 ildən çox müddətdə İsraildə yaşamasına və artıq əsl İsrail sakinləri olmalarına baxmayaraq, onlar çıxdıqları ölkənin köklərini, mədəniyyətini, dilini, adət-ənənəsini yaddan çıxarmırlar. “Azərbaycan diasporunun əsas məqsədlərindən biri İsrail siyasi elitasının Azərbaycanla, onun zəngin tarixi və mədəniyyəti ilə tanışlıq, xüsusilə Azərbaycan xalqının tarixi günlərinə həsr edilən tədbirlərin keçirilməsi məqsədilə Azərbaycanın tanıdılması üzrə ardıcıl və dəqiq iş aparmaqdır.
Azərbaycan diasporunun qarşısında həll ediləcək çox problem var. Onların arasında Azərbaycan xalqının milli ənənələrinin, dilinin, mədəni irsinin qorunub saxlanması və inkişaf etdirilməsi, İsrail cəmiyyətinə inteqrasiyasına kömək, vaxtilə Azərbaycanda yaşamış, hazırda İsraildə yaşayan vətəndaşlara hüquqi yardım göstərilməsi və sosial müdafiəsi kimi məsələlər yer alır.
Milli birlik olmadan inkişaf, sabitlik, tərəqqi mümkün deyil. Bu baxımdan, azərbaycanlıların və vaxtilə Azərbaycanda yaşamış, hazırda İsrailin vətəndaşları olan insanların həmrəyliyi xüsusi əhəmiyyət kəsb edir.
Şirin Nehamiya Mixaeli deyib: “Bu, zamanın tələbi və çağırışıdır. Lakin həmvətənlərimizin İsrail cəmiyyətinə fəal inteqrasiyası, onların cəmiyyət üçün aktual problemlərin həllində iştirakı hələ ki, kifayət qədər yüksək və arzuedilən səviyyədə deyil”.
Dünya Azərbaycanlılarının Həmrəylik Günü ilə əlaqədar “İsraildə Azərbaycan Evi” tərəfindən təşkil olunan tədbirdə Azərbaycan diasporunun tanınmış nümayəndələri iştirak ediblər.
Azərbaycan Respublikasının hazırkı möhtəşəm inkişafını əks etdirən gözəl musiqi və videokliplər azərbaycanlıların əsl birliyinin və həmrəyliyinin rəmzi olan bu bayram tədbirinə xüsusi rövnəq verirdi.
Bölmənin digər xəbərləri
