DÜNYA AZƏRBAYCANLILARININ I QURULTAYINA HƏSR EDİLMİŞ KONFRANS
Noyabrın 9-da “Avropa” mehmanxanasında dünya azərbaycanlılarının I qurultayının ildönümü ilə əlaqədar “Azərbaycan diasporu: reallıqlar və perspektivlər” mövzusunda konfrans keçirilmişdir. Konfransda qurultaydan sonra görülmüş işlərin yekunları, Azərbaycan diasporunun fəaliyyətini canlandırmağın strategiya və perspektivləri, güclü Azərbaycan lobbisi yaratmaq, Azərbaycan diasporunun və dövlət strukturlarının səylərini əlaqələndirmək məsələləri müzakirə edilmişdir.
Xarici Ölkələrdə Yaşayan Azərbaycanlılarla İş üzrə Dövlət Komitəsinin sədri Nazim İbrahimov konfransı giriş sözü ilə açaraq, dünya azərbaycanlılarının I qurultayının əhəmiyyətindən və qurultaydan sonra görülmüş işdən ətraflı bəhs etdi. O dedi ki, konfransdan məqsəd bu mühüm tədbirdən sonra ötən dövrdə əldə olunmuş nailiyyətlərdən söhbət açmaq və perspektivləri müəyyənləşdirməkdir.
Sonra Nazim İbrahimov Azərbaycan diasporunun formalaşması ilə bağlı dövlət siyasətinin öncül istiqamətləri barədə məruzə etdi. O, Azərbaycan Prezidenti Heydər Əliyevin təşəbbüsü ilə təsis edilmiş Dünya azərbaycanlılarının həmrəylik gününün əhəmiyyətini xüsusi vurğuladı. Natiq dövlətimizin başçısının qurultayda söylədiyi dərin məzmunlu nitqini dünyadakı bütün azərbaycanlı icmalarının fəaliyyətini əlaqələndirən proqram sənədi kimi səciyyələndirdi. O, başçılıq etdiyi komitənin fəaliyyətindən də danışaraq bildirdi ki, xaricdə yaşayan həmvətənlərimizlə işi gücləndirmək üçün komitənin nəzdində daha bir qurum - müasir texnologiya ilə təchiz olunmuş Diaspor Mərkəzi yaradılır.
Prezidentin İcra Aparatının ictimai-siyasi şöbəsinin müdiri Əli Həsənov çıxışında dünya azərbaycanlılarının I qurultayının tarixi əhəmiyyəti üzərində dayanaraq, Azərbaycan Prezidenti Heydər Əliyevin dünya azərbaycanlıları ilə əlaqələrə, Azərbaycan diasporunun yaradılmasına və həmvətənlərimiz arasında həmrəyliyə nail olunmasına böyük diqqət yetirdiyini söylədi. Bütün bu məsələlər dövlət siyasəti səviyyəsinə qaldırılmışdır. Əli Həsənov dünyanın müxtəlif ölkələrində yaşayan 40 milyon soydaşımızın səylərini bu diasporu siyasi, iqtisadi və mədəni qüvvəyə çevirmək məqsədi ilə əlaqələndirmək sahəsində dövlətin qarşısında duran vəzifələrə toxunaraq, bildirdi ki, bu qüvvə dünya azərbaycanlılarının rəmzi olan Azərbaycan Respublikasının möhkəmlənməsinə kömək edəcəkdir.
O dedi ki, dünya azərbaycanlılarının sıx birliyi və həmrəyliyi, ilk növbədə, öz həmvətənlərimizin milli və vətəndaş hüquqlarının həyata keçirilməsi üçün vacibdir, çünki onlar birləşməklə dünya siyasətinə təsir göstərə bilərlər. Bundan əlavə, səylərin birləşdirilməsi Azərbaycan xalqının milli və mənəvi dəyərlərinin qorunub saxlanmasında mühüm rol oynayır. Natiq dünya azərbaycanlıları ilə Azərbaycan dövlətinin daha sıx iqtisadi əlaqələrinin, ölkəmizin iqtisadiyyatına kapital qoymasının vacibliyini də vurğuladı. Məlum olduğu kimi, indi ölkəmiz öz karbohidrogen ehtiyatlarının ixracına və qabaqcıl dünya texnologiyasını Azərbaycan iqtisadiyyatına cəlb etməyə başlamışdır. Bu prosesdə həm dünya azərbaycanlılarının təşkilatları, həm də onların ayrı-ayrı nümayəndələri yaxından iştirak etməlidirlər.
Dünya Azərbaycanlılarının Əlaqələndirmə Şurasının sədri, Milli Elmlər Akademiyasının prezidenti Mahmud Kərimov konfransda Şuranın və onun professor Qulam Rza Təbrizinin rəhbərlik etdiyi mərkəzi ofisinin fəaliyyəti barədə məlumat verdi.
Təhsil naziri Misir Mərdanov, mədəniyyət naziri Polad Bülbüloğlu, Qadın Problemləri üzrə Dövlət Komitəsinin sədri Zəhra Quliyeva təhsil, mədəniyyət və qadın siyasəti sahəsində dünya azərbaycanlıları ilə əlaqələrin möhkəmləndirimlməsi üçün görülən tədbirlərdən danışdılar. Onlar məmnunluqla bildirdilər ki, indi dünyanın bir sıra ölkələrində Azərbaycan icmalarının federasiyaları, konqresləri fəaliyyət göstərir və bu qurumlar soydaşlarımızın səylərini birləşdirməyə kömək edir. Soydaşlarımızın özgürlüyünü qoruyb saxlaması və onların ana dilini öyrənməsi üçün bazar günü məktəbləri açılır. Qeyd olundu ki, respublikanın bütün nazirlikləri və baş idarələri Xaricdə Yaşayan Azərbaycanlılarla İş üzrə Dövlət Komitəsi ilə sıx əlaqədə işləməlidirlər.
Konfransda dünyanın müxtəlif ölkələri ilə dostluq cəmiyyətlərinin sədrləri, Milli Elmlər Akademiyasının əməkdaşları, qeyri-hökumət təşkilatlarının nümayəndələri də çıxış etdilər.
Konfrans iştirakçıları Azərbaycan Prezidenti Heydər Əliyevə müraciət qəbul etdilər. Müraciətdə deyilir ki, Azərbaycanın dövlət müstəqilliyinin 10-cu ildönümünün bayram edildiyi dövrdə keçirilmiş dünya azərbaycanlılarının I qurultayı xalqımızın həyatında tarixi hadisədir. Bu qurultay müxtəlif ölkələrdə yaşayan soyadaşlarımızı bir araya gətirdi, Azərbaycan icmalarını azərbaycançılıq ideyası, onların həmrəyliyinin möhkəmlətmək, Vətənlə əlaqələrinin genişləndir, Azərbaycan diasporunu mütəşəkkil qüvvəyə çevirmək ideyaları ətrafında birləşdirməkdə yeni mərhələ oldu.
Müraciətlə dövlətimizin başçısının xalq, millət naminə göstərdiyi xidmətlər, fədakarlığı və dünya azərbaycanlılarının I qurultayında, xaricdə yaşayan soydaşlarımızla, ziyalıların nümayəndələri ilə görüşlərində söylədiyi nitqləri dərindən öyrənməyin zəruriliyi xüsusi vurğulanır və milli özünədərkin, dilimizin və mədəniyyətimizin inkişafında, Azərbaycanın hüdudlarından kənardakı milyonlarla bacı və qardaşlarımızın insan və vətəndaş hüquqlarının müdafiəsində fəal iştirak etməyə çağırış ifadə olunur.
Bölmənin digər xəbərləri
