Dünyada gedən gərgin proseslər fonunda Azərbaycan iqtisadiyyatı dayanıqlığını qoruyub ŞƏRH
Bakı, 15 yanvar, AZƏRTAC
Prezident İlham Əliyev tərəfindən müəyyənləşdirilən və onun rəhbərliyi ilə uğurla həyata keçirilən sosial-iqtisadi siyasətin nəticəsində 2024-cü il ölkə həyatının bütün sahələrində olduğu kimi, iqtisadi sahədə də uğurları ilə yadda qalıb. Fərəhləndirici haldır ki, dünyada gedən gərgin proseslər, geosiyasi münaqişələr, kəskin iqlim anomaliyaları fonunda Azərbaycan iqtisadiyyatı öz dayanıqlığını qoruyub saxlayıb və iqtisadi inkişaf templərində artım əldə edib. İqtisadiyyatımız qarşısında duran hədəflərə nail olunub və qarşıda duran vəzifələr icra edilib. Təbii ki, bunların hamısı bu sahədə müsbət iqtisadi göstəricilərin əldə olunmasına imkan yaradıb. Bu isə illərlə aparılan siyasətin nəticəsi, vaxtında həyata keçirilən tədbirlərin bəhrəsidir. Uzun illər aparılan iqtisadi islahatlar, inflyasiyaya qarşı mübarizə, investisiyaların cəlb edilməsi, investisiya iqliminin yaxşılaşdırılması sahəsində dövlətin apardığı siyasət nəticəsində müsbət göstəricilər əldə olunub. Sözsüz ki, Qarabağ və Şərqi Zəngəzurda aparılan bərpa və quruculuq prosesləri də dövlətimiz üçün prioritet məsələlər sırasındadır. Eyni zamanda, ölkəmizin ümumi inkişaf tendensiyasına uyğun olaraq qarşıya qoyulan bütün proqramlar uğurla icra edilir. Bütün bunlar dünya iqtisadiyyatının artım templəri və inkişaf etmiş ölkələrin göstəriciləri ilə müqayisədə Azərbaycan iqtisadiyyatının uğurla inkişaf etdiyini nümayiş etdirir. Bunun təməlində həyata keçirilən uğurlu sosial-iqtisadi siyasət və düşünülmüş strategiya dayanır.
Bu fikirləri AZƏRTAC-a açıqlamasında Milli Məclisin deputatı Sevinc Hüseynova bildirib.
O qeyd edib ki, illər öncə Azərbaycan iqtisadiyyatı qarşısında duran ən ümdə vəzifələrdən biri neft sektorundan asılılığın azaldılması və qeyri-neft sektorunda sənayenin artımına nail olmaq idi. Məhz 2024-cü ilin sosial-iqtisadi göstəricilərinə nəzər salanda görürük ki, ümumi daxili məhsulda 4 faiz artıma nail olunub, qeyri-neft sektorunda 6 faiz, qeyri-neft sənayesində isə 7 faizdən çox artım qeydə alınıb. Məhz dünyada baş verən gərginliklər və qarşıdurmalar fonunda Azərbaycan iqtisadiyyatı bu cür müsbət göstəricilər əldə edib. Bu, təbii ki, Azərbaycan iqtisadiyyatının dayanıqlığını təsdiqləyən faktlardır. Nəzərə alsaq ki, 2024-cü ildə Qarabağ və Şərqi Zəngəzurda böyük quruculuq işləri aparılıb və ölkənin təhlükəsizlik tədbirlərinə böyük həcmdə vəsait ayrılıb. Eyni zamanda, ölkədə uğurlu sosial layihələr və proqramlar icra edilib. Valyuta ehtiyatlarımız 5 milyard dollar artaraq 72 milyard dollara çatıb və bu ehtiyatlar xarici borcumuzu 14 dəfə üstələyib. Onu da qeyd etmək lazımdır ki, ümumi daxili məhsulun nisbətində xarici borcumuz cəmi 7,2 faiz təşkil edir. Bu da Azərbaycan iqtisadiyyatının dayanıqlılığını təsdiqləyən mühüm göstəricilərdir.
Deputat 2025-ci ilin dövlət büdcəsinin müstəqil Azərbaycanın tarixində ən böyük büdcəsi olduğunu deyərək bildirib: “Büdcə xərcləri 41 milyard manatdan çox təsdiq olunub. Bu büdcənin 41 faizi sosial sahəyə yönəldilib. Bu, Azərbaycan dövlətinin sosialyönümlü siyasətinin uğurunu bir daha təsdiq edir. Büdcə xərclərinin bu məbləğdə təsdiq olunması yeni ilin ilk günlərində ölkə prezidenti tərəfindən həyata keçirilən sosial siyasətin davamı olaraq, müstəqil Azərbaycanın tarixində beşinci böyük sosial paketin icrasına imkan yaradıb. Dövlətimizin başçısının bəyan etdiyi kimi, 2025-ci ilin yanvarından etibarən minimum əməkhaqqı 55 manat artırılaraq 400 manata çatdırılıb, minimum pensiya isə 40 manat artaraq 320 manat olub. Orta hesabla bu artım 14-15 faiz təşkil edir. Bütün bu amillər Azərbaycanın sosial dövlət strategiyasının tərkib hissəsidir. Azərbaycan dövlətinin həyata keçirdiyi siyasətin mərkəzində insan amili dayanır. Qarşıya qoyulan əsas vəzifələrdən biri də vətəndaşların daha yaxşı yaşayış şəraitinin təmin edilməsi və onların sosial rifahının artırılmasıdır”.
Bölmənin digər xəbərləri
