DÜNYANIN 2,6 MİLYARD NƏFƏR ƏHALİSİ İÇMƏLİSUDAN KORLUQ ÇƏKMƏKDƏDİR
Hesabatda qeyd edilir ki, dünyanın bir çox ölkələrində indiyədək sutəmizləyici qurğuların, kanalizasiya qovşaqlarının hələ də yoxluğu səbəbindən milyardlarla əhali çirkab qarışığı olan natəmiz, bulanıq su mənbələrindən istifadə etməyə məcburdur. Şübhəsiz ki, bunun da son nəticəsi xəstəlik və ölümdür.
Dünya Səhiyyə Təşkilatı təşvişlə bildirir ki, son bir ildə çirkli su təsirindən mədə-bağırsaq və yatalaq xəstəliklərinə yoluxaraq ölən insanların sayı 1,8 milyonu ötüb keçmişdir. Dünyada bir gündə natəmiz sulardan istifadənin təsirindən ölən uşaqların sayı isə 4000-dən artıqdır.
YUNİCEF və Dünya Səhiyyə Təşkilatı inkişaf etmiş qabaqcıl ölkələri ehtiyacı olan ölkələrdə əhalinin müasir keyfiyyət standartlarına uyğun içməli su ilə təchizatının yaxşılaşdırılması və yenidən qurulması layihələrini təcili olaraq həyata keçirmək işinə yardımçı olmağa çağırmışlar.
