DÜŞƏNBƏDƏ NARKOTİKLƏRLƏ BAĞLI SEMİNAR KEÇİRİLMİŞDİR
Seminarda respublikamızı narkomanlığa və narkotik vasitələrin qanunsuz dövriyyəsinə qarşı mübarizə üzrə dövlət komissiyası işçi qrupunun rəhbəri İsrafil Əliyev və Daxili İşlər Nazirliyi Narkotiklərlə mübarizə baş idarəsinin şöbə rəisi İlqar Mahmudov təmsil etmişlər.
Tədbirdə narkotiklərlə bağlı Əfqanıstanda yaranmış vəziyyət və bundan çıxış yolları, bu ölkədəki narkovəziyyətin Mərkəzi Asiya, Qafqaz və digər dövlətlərə təsiri, bu sahədəki yeniliklər, narkotiklərlə mübarizə sahəsində səylərin əlaqələndirilməsi, bu bəlanın aradan qaldırılmasında yeni texnologiyanın tətbiqi və başqa məsələlər müzakirə olunmuşdur.
Seminarın sonuncu günü Azərbaycan nümayəndələri İsrafil Əliyev və İlqar Mahmudovun narkotiklərlə mübarizə sahəsindəki fəaliyyəti təqdir edilmiş, onlar Tacikistan Prezidenti yanında Narkotiklərlə Mübarizə Agentliyinin yaradılmasının 5 illiyi ilə əlaqədar yubiley medalı ilə təltif olunmuşlar.
İsrafil Əliyev seminarda bu sahədə Azərbaycandakı vəziyyət haqqında danışmışdır. O demişdir: -Ölkəmizdə beynəlxalq standartlara cavab verən “Narkotiklərin qanunsuz dövriyyəsi ilə mübarizə haqqında” Qanun qəbul olunmuş, 2000-ci ildə isə Prezidentin fərmanı ilə “Narkomaniyanın yayılması və narkotik vasitələrin, psixotrop maddələrin qanunsuz dövriyyəsi ilə mübarizə üzrə milli proqram” təsdiq edilmişdir. Onun sözlərinə görə, son 3 il ərzində Azərbaycanda yabanı bitən və qanunsuz əkilən 1 milyon dəyərində narkoxassəli bitki məhv edilmişdir.
