Bakı, 10 yanvar, AZƏRTAC

Prezident İlham Əliyevin yerli televiziya kanallarına müsahibəsində regionda və dünyada baş verən müasir siyasi reallıqlara düzgün və obyektiv qiymət verməklə ölkəmizin uğurlu inkişaf tablosuna bir daha aydınlıq gətirdi. Dövlətimizin başçısının vurğuladığı kimi, 2024-cü il ölkəmizin həyatında çoxsaylı uğurlarla yadda qalıb. Sosial-iqtisadi göstəriciləri ümidvericidir, Azərbaycanın iqtisadiyyatı sürətli inkişafını davam etdirib, ümumi daxili məhsul (ÜDM) 4 faizdən çox artıb. İqtisadiyyatın qeyri-neft-qaz sektorunda əlavə dəyər 6,4 faizdən çox artıb. Eləcə də sənayedə, xüsusən də qeyri-neft sənayesində artım meylləri yüksəlib. Ötən 11 ay ərzində 60 milyard manata yaxın sənaye məhsulu istehsal edilib ki, istehsalın əsas mənbəyini 7 faiz artımla qeyri-neft-qaz sektoru təşkil edir.

Bu fikirləri AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov səsləndirib.

Onun sözlərinə görə, Prezidentin də qeyd etdiyi kimi, bu göstəricilər iqtisadiyyatın şaxələndirilməsi ilə bağlı yürüdülən siyasətin mühüm nəticəsi olmaqla, müsbət təsirlərini göstərməkdədir. “Azərbaycanda neft istehsalı azalsa da, iqtisadi inkişafın əsas güc sütunları böyüməkdədir. İqtisadiyyatın şaxələndirilməsi ilə bağlı yürüdülən siyasət müsbət təsirlərini göstərir və artıq ölkənin inkişafında ağırlıq mərkəzi tamamilə qeyri-neft sektorunun üzərinə transformasiya olunur. Yaxınmüddətli iqtisadi inkişaf ssenarilərinə əsasən, neft-qaz sektorunun tədricən daralacağı şəraitində iqtisadi artımın əsas hərəkətverici qüvvəsi qeyri-neft gəlirləri olacaq və bu il ÜDM-in tərkibində qeyri-neft sektorunun payının 72 faizə çatacağı proqnozlaşdırılır. Eyni zamanda, qeyri-neft resurslarının yüksək artımları müqabilində ilin sonunda ümumi daxili məhsulun 5-6 faiz təşkil edəcəyi gözlənilir”, - deyə o əlavə edib.

Millət Məclisin deputatı qeyd edib ki, ötən il ölkəmizdə maliyyə ehtiyatlarını təmin edən yığım mənbələri genişlənib, xarici sərmayələrdə artım qeydə alınıb. “2024-cü ilin yanvar-noyabr aylarında əsas kapitala 15,9 milyard manat məbləğində investisiya yönəldilib. Bu dövrdə 4 milyard dollara yaxın xarici kapital cəlb edilib. Xarici sərmayələrin xüsusilə qeyri-neft sektoruna yatırılması intensivləşib. Eləcə də sərmayələr daha çox yeni sənaye mərkəzlərinə, sənaye parklarına, o cümlədən azad edilmiş ərazilərdə fəaliyyət göstərən Ağdam Sənaye Parkına və Cəbrayıldakı “Araz Vadisi İqtisadi Zonası”na yönəldilir”.

Aydın Hüseynov vurğulayıb ki, 2024-cü ildə əhalinin nominal gəlirlərində, bank əmanətlərində, ünvanlı sosial yardımın məbləğində, muzdlu işçilərin orta aylıq əməkhaqqında da artımlar qeydə alınıb ki, bu da uğurlu sosial-iqtisadi dinamika hesab edilə bilər. İqtisadiyyatda çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 7,8 faiz artaraq 993,2 manat təşkil edib. İqtisadiyyatın mədənçıxarma sənayesi, maliyyə və sığorta fəaliyyəti, peşə, elmi və texniki fəaliyyət, informasiya və rabitə, eləcə də nəqliyyat və anbar təsərrüfatı sahələrində orta aylıq nominal əməkhaqqı daha yüksək olub. Əhalinin real gəlirləri və bank dividendlərindən qazancı da 7-10 faiz arasında artıb.

“Dövlətimizin başçısı müsahibədə sosial islahatlar barədə danışaraq maliyyə imkanları yaxşılaşdıqca, davamlı olaraq vətəndaşların rifahı üçün tədbirlər görüldüyünü və görüləcəyini də bəyan etdi. Artıq 2025-ci ilin yanvarından etibarən ölkəmizdə beşinci sosial islahat paketi çərçivəsində sosial artımların icrasına start verilib. Minimum aylıq əməkhaqqının məbləğinin 16 faiz artırılaraq 345 manatdan 400 manata çatdırılması sayəsində dövlət və özəl sektorda çalışan insanların maaşlarının ən aşağı məbləği 400 manat təşkil edəcək. Fevralın 1-dən isə minimum pensiya 280 manatdan 320 manata çatdırılacaq. Prezidentin ötən il dekabrın 23-də imzaladığı Sərəncama uyğun olaraq, Nazirlər Kabineti üç ay müddətində müvafiq sənədi hazırlayacaq. Həmin sosial təkliflər toplusu mart ayının sonlarında hazır olduqdan sonra hüquqi mexanizm formalaşacaq və sosial paket üzrə bütün artımlar təmin ediləcək.

Bütün bunlar əhalinin sosial təminatının daha da gücləndirilməsinin prioritetliyini bir daha təsdiqləyir, il ərzində icra olunacaq sosial paketin əhatəsinin daha da genişlənəcəyindən xəbər verir”, - deyə o qeyd edib.