Noyabrın 13-də respublika Daxili İşlər Nazirliyində Azərbaycan Respublikası Prezidentinin “Sahibkarlığın inkişafına mane olan müdaxilələrin qarşısının alınması haqqında” 2002-ci il 28 sentyabr tarixli Fərmanından irəli gələn müddəaların həyata keçirilməsi və bununla əlaqədar Dövlət Yol Polisi xidməti əməkdaşları qarşısında duran vəzifələrin həlli yollarına həsr olunmuş geniş əməliyyat müşavirəsi keçirilmişdir. 

Müşavirəni giriş sözü ilə açan daxili işlər naziri, general-polkovnik Ramil Usubov Azərbaycan Respublikasının Prezidenti cənab Heydər Əliyevin rəhbərliyi ilə son illər uğurla həyata keçirilən ardıcıl, hüquqi-demokratik islahatlar nəticəsində cəmiyyət həyatının bütün istiqamətlərində böyük nailiyyətlər qazanıldığını, bunun nəticəsində ölkəmizin beynəlxalq aləmdə sabit, dinamik şəkildə inkişaf edən, sülhsevər, yüksək iqtisadi potensiala malik dövlət, etibarlı tərəfdaş kimi nüfuzunun möhkəmləndiyini bildirmişdir. Nazir qeyd etmişdir ki, ictimai-siyasi, sosial iqtisadi sahələrdə olduğu kimi, hüquq müharfizə orqanları, o cümlədən Daxili İşlər Nazirliyi sistemində də ciddi islahatlar gedir, onların fəaliyyətini tənzimləyən normativ-hüquqi baza beynəlxalq standartlara, qabaqcıl dünya təcrübəsinə uyğun olaraq daha da təkmilləşdirilir, zəruri struktur dəyişiklikləri aparılır.

Ölkənin iqtisadi həyatında mühüm əhəmiyyət kəsb edən sahibkarlığın inkişafına əngəl törədən amillərin aradan qaldırılması baxımından vacib olan məlum fərmanla bağlı Daxili İşlər Nazirliyinin rəhbərliyi tərəfindən zəruri tədbirlər həyata keçirilmiş, iqtisadiyyatda cinayətkarlıqla mübarizə xidməti ləğv edilmiş, dövlət yol polisinin ştatları isə 15 faiz ixtisar olunmuşdur. Eyni zamanda həmin Fərmanın daxili işlər orqanlarında dərindən öyrənilməsi, onun müddəalarından irəli gələn tələblərə dönmədən əməl olunmasının vacibliyi, sahibkarlıq fəaliyyətinə müdaxiləyə yol verən əməkdaşlar barəsində daxili işlər orqanlarından xaric olunanadək ən sərt ölçülərin götürüləcəyi onların nəzərinə çatdırılmışdır.

Sonra gündəlikdəki məsələlər barəsində məruzələr dinlənilmişdir. Azərbaycan Prezidentinin “Sahibkarlığın inkişafına mane olan müdaxilələrin qarşısının alınması haqqında” 2002-ci il 28 sentyabr tarixli Fərmanına əsasən dövlət yol polisi xidmətində aparılan təşkilati ştat və struktur dəyişiklikləri ilə əlaqədar ixtisara düşmüş əməkdaşların yerləşdirilməsi üzrə işin vəziyyətinə dair DİN Baş Kadrlar İdarəsinin rəisi, polis polkovniki Məmməd Əsgərov ətraflı məlumat vermişdir. DİN Baş Dövlət Yol Polisi idarəsinin rəisi, polis polkovniki Ramiz Zeynalov “Yol hərəkəti təhlükəsizliyinin təmini üzrə Azərbaycan Respublikasının qanunvericilik və Din-nin müvafiq normativ-hüquqi aktlarından irəli gələn vəzifələrin həyata keçirilməsi sahəsində dövlət yol polisi əməkdaşları tərəfindən görülən işlər barəsində məruzə ilə çıxış etmişdir. Dövlət Yol Polisi qurumlarında ixtisarlar aparıldığını, ixtisara düşmüş əməkdaşların digər xidmətlərə keçirildiyini bildirən Baş İdarə rəisi qeyd etmişdir ki, ölkə Prezidentinin iradları görülən işlərin daha dərindən təhlilini, onun müasir dövrün tələblərinə uyğun qurulmasını, xidməti fəaliyyətdə son illər əldə olunmuş müsbət meyllərin qorunması üçün elmi-texniki tərəqqinin yeni nailiyyətlərindən səmərəli istifadəsini, polis-vətəndaş hüquqi münasibətlərinin demokratik prinsiplərə uyğun qurulmasını zəruri edir, hərəkətin düzgün təşkili məsələlərini önə çəkir.

Paytaxtın dövlət yol polisi əməkdaşlarının fəaliyyətində olan nöqsan və çatışmazlıqların aradan qaldırılması, ölkə Prezidentinin məlum Fərmanının, bununla əlaqədar DİN-nin əmr və göstərişlərinin icrası barədə Bakı şəhər Dövlət Yol Polisi İdarəsinin rəisi, polis polkovniki Həsən Şirinov məruzə etmişdir.

Müşavirəyə yekun vuran daxili işlər naziri, general-polkovnik Ramil Usubov polisin əsas vəzifələrindən olan yol hərəkəti təhlükəsizliyinin təmini, yol-patrul xidmətinin keyfiyyətinin yaxşılaşdırılması, əməkdaşlar tərəfindən mənfi hallara yol verilməsinin qarşısının alınması işinə tələbkarlıq və nəzarətin gücləndirilməsi üçün əməli ölçülər götürüldüyünü söyləmişdir.

Bununla belə Dövlət Yol Polisinin ayrı-ayrı əməkdaşları tərəfindən insan hüquqlarının pozulması, nəqliyyat vasitələrinin işinə və hərəkətinə yersiz müdaxilə, yol hərəkəti qaydalarının tənzimlənməsi məsələlərində və yol hərəkəti iştirakçıları ilə münasibətlərdə özbaşınalıqlara yol verilməsi hallarına təəssüf ki, hələ də rast gəlinir. Daxili işlər nazirinin fikrincə, belə mənfi təzahürlər vətəndaşların və ya iş adamlarının haqlı narazılığına səbəb olur və bütövlükdə daxili işlər orqanlarının nüfuzuna, cəmiyyətimiz tərəfindən təqdir olunan önəmli fəaliyyətinə, qazanılmış uğurlarına xələl gətirir.

Dövlət Yol Polisi, digər bayır xidmətləri ilə yanaşı, ölkə başçısının qeyd etdiyi kimi, əhali ilə daim sıx təmasda olan əsas nizami hissələrdən biri olaraq öz davranışı ilə vətəndaşlarda, xarici iş adamlarında Azərbaycan polisi, bütövlükdə dövlətimiz haqqında təəssürat yaradır. Nazirlik tərəfindən polisin fəaliyyəti ilə bağlı müvafiq əmrlərin, təlimatların, göstərişlərin, hətta davranış qaydaları haqqında metodiki vəsaitlərin yerlərə göndərilməsinə baxmayaraq, bəzən ayrı-ayrı rəhbər işçilər və əməkdaşlar bu məsələyə laqeyd münasibət bəsləyirlər. Bir sıra hallarda mənfi hərəkətlərə, sürücülərlə kobud rəftara yol verilir. Belə əməkdaşlarla bağlı nazirliyə daxil olmuş hər bir müraciət araşdırılır, günahkar şəxslər barədə ciddi intizam tədbirləri görülür.

Daha sonra general-polkovnik R.Usubov qeyd etmişdir ki, hamıya yaxşı məlum olan nöqsanlar, xidmət zamanı baş verən mənfi təzahürlər, bununla əlaqədar vətəndaşların haqlı narazılıqları, dövlət başçısının əsaslı iradları yol polisi xidmətinin rəhbərliyini və əməkdaşlarını ciddi düşündürməli, onların fəaliyyətində köklü dəyişikliklərin baş verməsinə səbəb olmalıdır.

Sonra daxili işlər naziri yol hərəkətinin təhlükəsizliyinin təmini sahəsində qarşıda duran vəzifələri və onların həlli yollarını müşavirə iştirakçılarının nəzərinə çatdıraraq bildirmişdir ki, hərəkət iştirakçıları arasında hüquqi təbliğat və maarifləndirmə işi genişləndirilməli, bu məqsədlə və mənfi halların tezliklə aradan qaldırılması üçün xüsusi tədbirlər hazırlanıb həyata keçirilməli, hərəkətin təhlükəsizliyinin təmini işinin daha da təkmilləşdirilməsi üzrə təşəbbüskarlıq artırılmalıdır. Bu məqsədlə qabaqcıl dünya təcrübəsi öyrənilməli və fəaliyyətdə tətbiq olunmalıdır.

Nazirin çıxışında bir daha bəyan edilmişdir ki, Azərbaycan Respublikası Prezidentinin Fərmanından irəli gələn müddəalarla əlaqədar nazirliyin rəhbərliyinin mövqeyi qəti, birmənalı və prinsipialdır: sahibkarlığın inkişafına mane olan müdaxilələr, avtonəqliyyat vasitələrinin əsassız və yersiz saxlanılması yolverilməzdir. Daxili işlər naziri, general-polkovnik Ramil Usubov müşavirəyə yekun vuraraq Azərbaycan Prezidenti cənab Heydər Əliyevin polis gününə həsr olunmuş təntənəli mərasimdə söylədiyi müdrik bir kəlamı xatırlatmış və onu daxili işlər orqanları əməkdaşlarının fəaliyyətində rəhbər tutulmasını tövsiyə etmişdir: “...gərək elə işləyəsiniz, özünüzü elə göstərəsiniz, vətəndaşlarla o qədər mülayim, amma cinayətkarlığa qarşı o qədər barışmaz olasınız ki, insanlar sizi dövlətin bir nümayəndəsi kimi sevsinlər. Mən istəyirəm ki, polisi sevsinlər...”.

Nazir əmin olduğunu bildirmişdir ki, dövlət yol polisi əməkdaşları ölkə rəhbərinin qarşıya qoyduğu məsul vəzifələrin öhdəsindən layiqincə gələcək, haqlı tənqid və iradlardan düzgün nəticə çıxaracaq, yol hərəkəti təhlükəsizliyinin daha etibarlı təmini və insan hüquqlarına ciddi riayət olunması üçün fəaliyyətlərini, səylərini bir an səngitməyəcək, möhtərəm Prezidentimiz cənab Heydər Əliyevin daxili işlər orqanlarına olan etimadını daim doğruldacaqlar.

Daxili İşlər Nazirliyi

Mətbuat xidməti