“Əbədiyyətə qovuşan ömrün 103-cü baharı”: Kənd Təsərrüfatı Nazirliyində Ümummilli Liderin xatirəsi anılıb
Bakı, 1 may, AZƏRTAC
Kənd Təsərrüfatı Nazirliyində Ulu Öndər Heydər Əliyevin anadan olmasının 103 illiyinə həsr olunmuş “Əbədiyyətə qovuşan ömrün 103-cü baharı” mövzusunda tədbir keçirilib. Tədbir Yeni Azərbaycan Partiyası və Kənd Təsərrüfatı Nazirliyinin birgə təşkilatçılığı ilə baş tutub.
Nazirliyin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, tədbir iştirakçıları əvvəlcə Ümummilli Lider Heydər Əliyevin Kənd Təsərrüfatı Nazirliyinin inzibati binasının foyesində ucaldılmış büstü önünə əklil qoyub, əziz xatirəsini ehtiramla anıblar. Sonra tədbir iştirakçıları Ulu Öndərin aqrar sahədə fəaliyyətindən bəhs edən fotosərgi ilə tanış olublar.
Dövlət Himninin səsləndirilməsi ilə başlayan tədbirdə Ümummilli Lider Heydər Əliyevin və Vətən uğrunda canından keçən qəhrəman şəhidlərimizin əziz xatirəsi bir dəqiqəlik sükutla yad edilib, Ulu Öndərin xatirəsinə həsr olunmuş film nümayiş etdirilib.
Tədbiri açan kənd təsərrüfatı naziri Məcnun Məmmədov Ümummilli Lider Heydər Əliyevin ömrünü Azərbaycanın dövlət müstəqilliyi və yüksəlişi ilə eyniləşən əbədi bir yol adlandırıb. Nazir qeyd edib ki, Ulu Öndərin fəaliyyətinin hər bir mərhələsi xalqımızın rifahına, ölkəmizin qüdrətlənməsinə xidmət edib: “Bu gün Ümummilli Liderin siyasi kursu Prezident, Müzəffər Ali Baş Komandan İlham Əliyev tərəfindən uğurla davam etdirilir. Ulu Öndərin müəyyən etdiyi strateji xətt bu gün Prezident İlham Əliyevin yürütdüyü aqrar siyasət nəticəsində ölkəmizi kənd təsərrüfatı sahəsində innovasiyaların, yaşıl iqtisadiyyatın və “Ağıllı kənd” konsepsiyalarının tətbiq olunduğu məkana çevirib. Xüsusilə vurğulamaq istəyirəm ki, işğaldan azad edilmiş və yaşıl enerji zonası elan olunmuş Qarabağ və Şərqi Zəngəzurun münbit torpaqlarının yenidən əkin dövriyyəsinə qaytarılması Ulu Öndərin ruhunu şad edən ən böyük tarixi hadisələrdəndir”.
Çıxış edən Yeni Azərbaycan Partiyası Sədrinin müavini – Mərkəzi Aparatın rəhbəri Tahir Budaqov Ulu Öndərin Azərbaycan tarixindəki misilsiz xidmətlərindən, müstəqil Azərbaycan dövlətinin qurulması, müstəqilliyinin qorunub saxlanılması istiqamətində fəaliyyətindən bəhs edib. Bildirib ki, Ulu Öndərin Azərbaycana rəhbərlik etdiyi bütün dövrlərdə həyata keçirilən tədbirlər ölkəmizin iqtisadi potensialının artmasına və dayanıqlı inkişafına möhkəm zəmin yaradıb.
Milli Məclisin Aqrar siyasət komitəsinin sədri Tahir Rzayev çıxışında Ümummilli Liderin Azərbaycana hakimiyyəti dövründə əldə edilən uğurlara toxunub. Komitə sədri qeyd edib ki, Ulu Öndərin Azərbaycana rəhbərliyi dövründə iqtisadiyyatın bütün sahələrində olduğu kimi, aqrar sahənin inkişafında da yeni dönüş mərhələsi başlayıb, kənd təsərrüfatı istehsalının əsaslı yüksəlişi təmin edilib.
Nazirlər Kabineti Aparatının Aqrar və ekologiya şöbəsinin müdiri Lətif Qasımov Ümummilli Liderin Azərbaycan xalqı və dövləti qarşısında xidmətlərindən bəhs edib. Bildirib ki, Ulu Öndərin Azərbaycana rəhbərliyi dövründə kənd təsərrüfatı sadəcə iqtisadi deyil, milli təhlükəsizlik və sosial rifahın əsas dayaqlarından biri kimi qiymətləndirilib. Heydər Əliyevin aqrar siyasəti uzunmüddətli dövr üçün strateji yanaşmanı özündə ehtiva edən siyasət olmaqla, bütövlükdə ölkəmizin dinamik inkişafını təmin edib.
Azərbaycanın siyasi və dövlət xadimi, diplomat, tarix elmləri doktoru Həsən Həsənov Ulu Öndər Heydər Əliyevlə bağlı xatirələrini bölüşüb, dahi rəhbərin Azərbaycan həqiqətlərinin dünya ictimaiyyətinə çatdırılması istiqamətində ardıcıl və prinsipial siyasətindən, tarixi irsimizin qorunmasında misilsiz xidmətlərindən söz açıb.
Tədbirdə çıxış edənlər vurğulayıblar ki, Ulu Öndər Heydər Əliyevin müəyyən etdiyi uzaqgörən siyasət, o cümlədən məqsəd, vəzifə və prinsiplərə əsaslanan sosial-iqtisadi siyasət hazırda Prezident İlham Əliyevin rəhbərliyi altında uğurla davam etdirilir.
Sonda Yeni Azərbaycan Partiyasının sıralarına yeni daxil olan şəxslərə üzvlük vəsiqələri təqdim olunub.
Bölmənin digər xəbərləri
