ƏDLİYYƏ NAZİRLİYİNİN MÜHAFİZƏ ALAYINDA ƏSGƏRLƏR VƏTƏNƏ SƏDAQƏT ANDI İÇMİŞLƏR
Azərbaycanın Dövlət himni səsləndi. Dövlət bayrağı hərbi marşın sədaları altında meydana gətirildi. Əsgərlər vətənə, xalqa, dövlətə sədaqət andı içdilər. Əsgərlər adından Mahir Cəfərov, valideynlər adından Fərrux Abbasov çıxış edərək, əsgəri xidmətin şərəf və məsuliyyətindən danışdılar, gənclərə uğurlar arzuladılar.
Sonra ədliyyə naziri Fikrət Məmmədov mərasimdə nitq söylədi. Vətənin müdafiəsinin hər bir vətəndaşın müqəddəs borcu olduğunu, ümummilli liderimiz Heydər Əliyevin yaratdığı nizami Azərbaycan ordusunda bu şərəfli borcu ləyaqətlə yerinə yetirmək üçün hər cür şəraitin mövcudluğunu vurğulayan nazir, 1956-cı ildə təşkil olunmuş bu alayın ölkənin bütün cəzaçəkmə müəssisələrinin mühafizəsini həyata keçirdiyini bildirdi. İşğal altında olan Azərbaycan torpaqlarının azad edilməsi üçün ordumuzun Ali Baş Komandan İlham Əliyevin rəhbərliyi ilə gündən-günə möhkəmləndiyini, hər an düşmənə ağır zərbə vurmağa hazır olduğunu faktlarla diqqətə çatdıran natiq, 1999-cu ildə bir qrup təhlükəli cinayətkarın törətdiyi əməllərin qarşısının alınmasında və erməni təcavüzünə qarşı aparılan döyüş əməliyyatlarında şəxsi qəhrəmanlıq və şücaət göstərdiklərinə görə mühafizə alayının 7 hərbçisinin Azərbaycanın Milli Qəhrəmanı adına layiq görüldüyünü, 50-dən çox əsgər və zabitin “Azərbaycan bayrağı” ordeni və “İgidliyə görə” medalları ilə təltif olunduğunu, bu şərəfli mübarizədə 26 hərbçinin şəhidlik zirvəsinə ucaldığını qeyd etdi. Şəxsi heyətin vətənin müdafiəsi uğrunda döyüşlərə hər an hazır olduğunu vurğulayan ədliyyə naziri, alayın əsgər və zabitlərinin idmanın müxtəlif növləri üzrə dünya, Avropa və respublika çempionatlarının qalibi olduqlarını da söylədi. Ədliyyə işçilərinin peşə bayramı ərəfəsində alayın kiçik rəis heyətində nümunəvi xidmət edən əməkdaşların bir qrupuna zabit rütbələri verildiyi, onların ədliyyə orqanlarında işə qəbul olunduğu bildirildi.
Noyabrın 6-da respublikamızda keçirilmiş parlament seçkilərində xalqımızın böyük əksəriyyəti kimi ədliyyə işçilərinin də ulu öndər Heydər Əliyevin qurduğu, Prezident İlham Əliyevin rəhbərlik etdiyi Yeni Azərbaycan Partiyasının namizədlərinə, ölkəmizin gələcək tərəqqisinə, sivil inkişafına, dünya birliyinə inteqrasiyasına səs verdiyini bildirən nazir vurğuladı ki, xalqımız radikal müxalifətin qarşıdurmaya, xaosa aparan siyasətini qətiyyətlə rədd edir.
Ölkəmizin iqtisadi inkişaf, ümumi daxili məhsul istehsalının artım sürətinə görə dünya dövlətləri arasında liderə çevrildiyini, 300 mindən çox yeni iş yerinin açıldığını, hərbi sahəyə ayrılan vəsaitin Ermənistanın dövlət büdcəsinə bərabər olduğunu bildirən nazir, bütün bunların Ədliyyə Nazirliyi sistemində də əsaslı dəyişikliklərə imkan yaratdığını bildirdi. Azərbaycan Prezidentinin tapşırığı ilə penitensiar sistemdə əsaslı islahatların aparıldığı, əsgərlərin ərzaq, əşya, geyim təminatı, sanitar-gigiyenik şəraitinin xeyli yaxşılaşdığı, bu sahəyə ayrılan vəsaitin həcminin ötən illərlə müqayisədə bir neçə dəfə artdığı, tibbi xidmətin səviyyəsinin yüksəldiyi, yeni kommunal-məişət obyektlərinin tikilib istifadəyə verildiyi faktlarla diqqətə çatdırıldı, hərbi hissədə nizam-intizamın möhkəmləndirilməsi, əsgərlərin fiziki, mənəvi, döyüş hazırlığının gücləndirildiyi bildirildi. Ədliyyə naziri əsgərləri hərbi and içmələri və ədliyyə işçilərinin peşə bayramı münasibətilə təbrik etdi.
Sonra alayın xüsusi təyinatlı dəstəsi fiziki və döyüş hazırlığını, əsgərlərin peşəkarlığını əks etdirən nümunəvi çıxışları nümayiş etdirdilər. Azərbaycan Dövlət Mahnı Teatrının kollektivi şəxsi heyət qarşısında konsert proqramı ilə çıxış etdi. Mühafizə alayının əsgərləri üçün bayram süfrəsi təşkil olundu.
Ədliyyə naziri veteranlar, valideynlərlə birlikdə mərkəzi meydandakı Şəhidlər abidəsini ziyarət etdi, alayda yeni tikilmiş, əsaslı təmir və bərpa olunmuş kommunal-məişət obyektlərinə, yeməkxana, idman zallarına, mühafizə qurğularına, texniki vasitələrə baxdı, əsgərlərin şəraiti ilə tanış oldu.
Bölmənin digər xəbərləri
