ƏFQANISTANIN XARİCİ İŞLƏR NAZİRİ ÖZBƏKİSTANDA SƏFƏRDƏ OLMUŞDUR
AZƏRTAC-ın xüsusi müxbiri xəbər verir ki, Özbəkistanın xarici işlər naziri Sadıq Safayevlə görüşdən sonra keçirdikləri birgə mətbuat konfransında Abdulla Abdulla bildirmişdir ki, bizim ölkəmizin gələcəyi qonşularımızın qarşılıqlı münasibətlərinin səviyyəsindən asılıdır. Biz Böyük İpək yolunu dirçəltməyə çalışırıq. Əfqanıstan Mərkəzi Asiya və İran körfəzi ölkələri arasında tranzit dövlət olmağa çalışır və bu istiqamətdə müxtəlif layihələrin həyata keçirilməsində maraqlıdır.
Özbəkistan xarici işlər naziri S.Safayev demişdir ki, Özbəkistan Əfqanıstanı regionun tərkib hissəsi hesab edir. Əfqanıstan regionlararası əlaqələrdə birləşdirici halqadır.
Nazir Mərkəzi Asiya dövlətlərini İran körfəzi ölkələri ilə birləşdirən transəfqan dəhlizinin yaradılması təşəbbüsünü irəli sürmüşdür.
Əfqanıstan nümayəndə heyəti Özbəkistanın baş naziri Şavkat Mirziyayevlə də görüşmüşdür. Görüşdə qarşılıqlı münasibətlərin inkişaf perspektivləri, Əfqanıstanın iqtisadiyyatının dirçəldilməsində Özbəkistan müəssisələrinin iştirakı məsələsi müzakirə olunmuşdur.
Danışıqların yekunu olaraq bir sıra ikitərəfli sənədlər imzalanmışdır.
