Əhəd Qəzayi: İran-Azərbaycan əlaqələrinin inkişafının əsası ulu öndər Heydər Əliyev tərəfindən qoyulub
Tehran, 11 dekabr, AZƏRTAC.
İran ilə Azərbaycan Respublikası arasındakı əlaqələrin inkişafının əsası Ulu öndər Heydər Əliyev tərəfindən qoyulub və bu gün Prezident İlham Əliyev tərəfindən uğurla davam etdirilir.
Bu sözləri AZƏRTAC-a müsahibəsində İranın Azərbaycandakı keçmiş səfiri Əhəd Qəzayi deyib. O, Azərbaycanda səfir kimi fəaliyyət göstərdiyi illərdə ümummilli lider Heydər Əliyevlə görüşlərini və söhbətlərini xatırlayıb. Diqqətə çatdırıb ki, görkəmli siyasi və dövlət xadimi olan Heydər Əliyev Azərbaycanın islam ölkələri ilə əlaqələrinə çox diqqətlə yanaşırdı. Bu baxımdan İran ilə münasibətlərin inkişafı barədə çox müvafiq addımlar atırdı. Diplomat vurğulayıb ki, İranın siyasi elitasında Heydər Əliyev böyük nüfuza malik idi. Onun çıxışları və təklifləri hər iki dövlətin maraqlarını əks etdirirdi.
Keçmiş səfir qeyd edib ki, bu gün dünyada yaşayan bütün müsəlman xalqların birliyə və həmrəyliyə böyük ehtiyacı var. Xalqların yaxınlaşması və həmrəyliyi dövlətlərə yalnız fayda verə bilər. Həmrəylik dostluğun və qardaşlığın əsasıdır. Bu prinsipləri əsas tutan Prezident İlham Əliyev Heydər Əliyevin siyasi kursunu davam etdirərək Azərbaycana zəfər qazandırdı.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
