EKOLOGİYA VƏ TƏBİİ SƏRVƏTLƏR NAZİRLİYİ KÜRÜ İXRACINA QADAĞA QOYULMASI BARƏDƏ MƏLUMATLARI TƏKZİB ETMİŞDİR
AZƏRTAC-a daxil olmuş bəyanatda deyilir ki, bu cür məlumatların xarakteri və forması göstərir ki, həm xarici, həm də yerli KİV-lərin nümayəndələri vəziyyətdən tamamilə xəbərsizdirlər və faktların şərhində kobud təhriflərə yol verirlər. Qara kürünün ixracına qadağa qoyulması barədə məlumatlar həqiqətə uyğun deyildir. Ekologiya və Təbii Sərvətlər Nazirliyi vəziyyəti aydınlaşdırmaq üçün Cim Armstronqla əlaqə saxlamışdır və o, həmin informasiyanı təkzib edərək bildirmişdir ki, “Nyu-York tayms” qəzetinin redaksiyasına kəskin bəyanat və məqalə müəllifindən şikayət göndərmişdir.
Nərə balıqlarından hazırlanan məhsulların ixracına 2004-cü il kvotası cari ilin əvvəlində Xəzərin bioehtiyatları komissiyası çərçivəsində Xəzəryanı ölkələrlə razılaşdırılmış və təsdiq üçün SİTES katibliyinə təqdim olunmuşdur. Konvensiya tərəflərinin 2002-ci ilin noyabrında qəbul etdikləri 12.7 Qətnaməsinə əsasən, nərə balığı növlərindən hazırlanan məhsullara ixrac kvotası bir sıra tələblər tam yerinə yetirildiyi halda təsdiq oluna bilər. Katiblik bu tələblərə aid əlavə məlumat göndərmək xahişi ilə Xəzəryanı ölkələrə müraciət etmiş və vəziyyətin tam aydınlaşdırılması üçün 2004-cü il avqustun sonunda Cenevrədə görüş keçirilməsi təklifini irəli sürmüşdür. Azərbaycan nəinki tələb olunan informasiyanı təqdim etmiş, həm də görüşdə iştirak edəcəyini təsdiqləmişdir. Cim Armstronq bir qədər sonra, 2004-cü il 17 avqust tarixli məktubunda bildirmişdir ki, Rusiya Federasiyası və Türkmənistan iştiraklarını təsdiq etmədiklərindən görüş təxirə salınmışdır. Bunu nəzərə alaraq, Azərbaycan Konvensiya tərəflərinin bu il oktyabrın əvvəllərində Banqkokda keçiriləcək 13-cü konfransı zamanı görüşməyi təklif etmişdir.
Bəyanatda daha sonra deyilir ki, SİTES Konvensiyasının saytında Azərbaycanın kvotasından savayı, bütün kvotaların göstərildiyi barədə məlumat da həqiqətə uyğun deyildir. 2004-cü il üçün ixrac kvotaları haqqında sənədin başlığında aydın şəkildə göstərilir ki, nərəkimilərə qoyulan kvotalar bu sənədə daxil edilməmişdir. Deməli, sənəddə təkcə Azərbaycanın deyil, digər Xəzəryanı ölkələrin də nərə balığı məhsullarının ixracına qoyulmuş kvotalar yoxdur.
Bəyanatda həmçinin belə bir faktla bağlı da təəssüf ifadə olunur ki, qəzetin jurnalistləri vəziyyəti aydınlaşdırmaq üçün SİTES-in Azərbaycandakı inzibati orqanına deyil, üzdəniraq “ekspertlərə” müraciət edirlər. Belə ki, onlar 1992-1993-cü illərdə “Azərbalıq” Dövlət Konserninə başçılıq etmiş və bu sahədə “fəaliyyətinə” görə məhkum olunmuş H.Hacıyevə müraciət etmişlər. Bəyanatda deyilir: “Azərbaycanın 1998-ci ildən Konvensiyanın üzvü olması faktını nəzərə alaraq, SİTES-in inzibati orqanını səriştəsizlikdə təqsirləndirən H.Hacıyevə istinad etmək düzgün deyildir”.
Bölmənin digər xəbərləri
