Ekspert: Avropa İttifaqı–Azərbaycan əlaqələrində müsbət dinamikanın bundan sonra da davam edəcəyi gözlənilir
Bakı, 9 fevral, AZƏRTAC
Vətən müharibəsi regiondakı geosiyasi mənzərəni yenidən formalaşdırdı və əvvəlki dövrdən əhəmiyyətli dərəcədə fərqli reallıqlar yaratdı. Bu kontekstdə baş vermiş əsas hadisələrdən biri məhz Avropa İttifaqının (Aİ) və onun aparıcı dövlətlərinin Cənubi Qafqazla bağlı siyasətində müşahidə edildi. Müharibədən sonrakı ilk aylarda Aİ siyasətçilərinin bəyanatlarında ölkəmizə qarşı qərəzli yanaşmalar müşahidə edilsə də, son günlərdəki proseslər artıq iki tərəf arasında münasibətlərdə yeni dövrün başlandığını deməyə əsas verir. Bu, nəinki Aİ-Azərbaycan əlaqələrinə birbaşa aid olan investisiya paketinin elan edilməsində, həmçinin regiondakı tərəflər üçün daha həssas olan Ermənistan-Azərbaycan sülh prosesinə yanaşmada özünü göstərir.
Bunu AZƏRTAC-a açıqlamasında Beynəlxalq Münasibətlərin Təhlili Mərkəzinin baş məsləhətçisi Vasif Hüseynov deyib.
Ekspertin sözlərinə görə, uzun tərəddüdlərdən sonra artıq avropalı rəsmilər deməkdən çəkinmir ki, Azərbaycan-Ermənistan münaqişəsi sona çatıb və artıq postmünaqişə mərhələsinin çağırışları ilə məşğul olmaq vaxtıdır. Fevralın 4-də Ermənistan və Azərbaycan liderlərinin videoformatda görüşünü təşkil edən Fransa Prezidenti Emmanuel Makron və Avropa İttifaqı Şurasının Prezidenti Şarl Mişelin görüşdən sonrakı bəyanatı bu qəbildən olan sənəd idi. Sənəddə görmək olar ki, Aİ artıq Azərbaycan və Ermənistan liderlərinin Moskva və Soçi görüşlərinin gündəliyində müvafiq məsələlərin müzakirəsinə önəm verir və “Dağlıq Qarabağ münaqişəsi”, “Minsk qrupu”, “status” məsələlərinin daxil olduğu müharibədən əvvəlki dövrün gündəliyini keçmişdə qoyur. Qeyd edilməlidir ki, bu yanaşma nəinki bu sənəddə, həmçinin siyasilərin ritorikasında da aydın ifadə edilir.
“Fevralın 4-də Cənubi Qaz Dəhlizinin Məşvərət Şurasının VIII toplantısında iştirak etmək üçün Bakıda səfərdə olan Avropa İttifaqının qonşuluq və genişlənmə üzrə komissarı Oliver Varhelyi Azərbaycanın xarici işlər naziri Ceyhun Bayramovla keçirdiyi mətbuat konfransında bildirdi ki, Aİ iki tərəf arasında münaqişədən sonra gərginliyin azaldılmasına istiqamətlənən barışıq səylərini dəstəkləməyə hazırdır. Eyni zamanda, komissar qeyd etdi ki, Aİ ərazilərin minalardan təmizlənməsi məsələsinə, həmçinin Ermənistanla Azərbaycan arasında delimitasiya və demarkasiya prosesinə texniki yardım göstərə bilər. Son olaraq Fransanın Azərbaycana “postmünaqişə” və “sülh danışıqları” mərhələsində minalardan təmizləmə və mina qurbanlarına yardım sahəsində kömək təklif etməsi, itkin düşmüş şəxslərin müəyyənləşdirilməsinə yardım üçün tərəflərlə, xüsusilə Azərbaycanla işləməyə davam edəcəyini bildirməsi bu ölkənin regionla bağlı siyasətində də çox məqamları aydınlaşdırır. Qatı ermənipərəst fransız siyasi qüvvələrin bütün səylərinə baxmayaraq, ölkəmizlə Fransa arasındakı münasibətlər də Azərbaycan-Aİ əlaqələrinin ümumi ruhuna uyğun olaraq inkişaf edir və gözləmək olar ki, bundan sonra da inkişaf edəcək”, - deyə V. Hüseynov qeyd edib.
Bölmənin digər xəbərləri
