“Əl Cəzirə”: Qarabağın tam azad olunması Azərbaycanın iqtisadi inkişafına töhfə verəcək
Bakı, 30 oktyabr, AZƏRTAC
Qətərin nüfuzlu “Əl Cəzirə” telekanalının saytında jurnalist və siyasi icmalçı Fəhim əl Suraninin müəllifi olduğu “Qarabağın azad edilməsi Azərbaycan iqtisadiyyatına töhfə verəcəkmi?” sərlövhəli geniş məqalə dərc olunub.
AZƏRTAC xəbər verir ki, məqalədə Ermənistanla onilliklər ərzində davam edən münaqişədən sonra Qarabağ bölgəsində Azərbaycanın suverenliyinin bərpa olunmasının təkcə geosiyasi nöqteyi-nəzərdən deyil, həm də regionun iqtisadi əhəmiyyəti baxımından mühüm olduğu qeyd edilib. Müəllif yazır ki, əvvəlki illərdə - bu torpaqların Ermənistanın işğalı altında olduğu dövrdə buradakı separatçılar İrəvanın maliyyə yardımı və beynəlxalq ianələr hesabına mövcud olublar. Bundan başqa, Beynəlxalq Böhran Qrupunun 2021-ci ildə dərc etdiyi hesabatda deyilir ki, Qarabağdakı qondarma rejim qlobal erməni diaspor təşkilatlarından da yardım alıb, lakin yardımın ümumi məbləği heç bir rəsmi sənəddə qeyd olunmayıb.
Müəllif yazır: “Digər tərəfdən, Azərbaycan rəsmilərinin rəsmi bəyanatları göstərir ki, Bakı indi regionla inteqrasiya problemini həll etmək üçün tədbirlər həyata keçirir, Qarabağda çökmüş iqtisadiyyatın reabilitasiyası prosesinin başlanmasına xüsusi diqqət yetirir. Azərbaycan Statistika Komitəsinin məlumatına görə, 2022-ci ildə ÜDM 78,7 milyard dollara çatdığı halda, Qarabağda iqtisadi inteqrasiya prosesləri sayəsində cari ildə bu rəqəmin 0,8 faiz artacağı gözlənilir. Keçən il təxminən 700 milyon dollar təşkil edən regionun ümumi daxili məhsulunun təqribən dörddəbiri qızıl, gümüş, mis və tikinti daşlarının hasilatından əldə edilib, eyni zamanda, bir çox yerli su elektrik stansiyalarının elektrik enerjisini ixrac etməyə imkan verməsi Azərbaycan xəzinəsinə əlavə gəlir gətirəcək. Bundan əlavə, regionda vəziyyətin sabitləşməsi Azərbaycanın dünyanın qalan ölkələri, xüsusən də qonşu dövlətlərlə ticarət həcmini əhəmiyyətli dərəcədə artıracaq ki, bu da Bakının iqtisadi gücünə müsbət təsir göstərəcək”.
Müəllif Azərbaycan iqtisadiyyatçılarına istinadla bildirib ki, böyük neft və qaz ehtiyatlarına, həmçinin müxtəlif transmilli kommunikasiya vasitələrinə malik olan Azərbaycanın rolu regionun bərpası prosesindən sonra daha da artıb, bununla yanaşı, Bakının xeyrinə rol oynayan digər amillərdən ən mühümü də Avropanın təcili enerji ehtiyacıdır. Son geosiyasi dəyişikliklər, xüsusən Ukraynada müharibə Azərbaycan qazına olan tələbatı daha da artırıb. Xəzər dənizindəki yataqlardan Avropaya 3500 kilometr uzunluğunda qaz kəməri vasitəsilə böyük nəql infrastrukturunun istismarı göstərir ki, Bakı dünyanın enerji təhlükəsizliyinə növbəti töhfəsini verəcək.
Məqalədə Qarabağda iqtisadi və kommunikasiya layihələrinə, habelə köhnəlmiş infrastrukturun bərpasına investisiyaların tələb olunduğu da qeyd edilib. Bu məqsədlə Azərbaycan hökuməti xarici iş adamlarına və investorlara əlverişli imkanlar yaradır. “Qarabağın Bakının suverenliyinə qaytarılması iqtisadi layihələrə start vermək üçün əlverişli atmosferin yaradılması baxımından vacibdir, lakin orta və uzunmüddətli perspektivdə strateji transformasiyanın başlanması da mühüm amildir. Zəngəzur strateji dəhlizi reallaşarsa, Azərbaycan beynəlxalq nəqliyyat üçün mühüm qlobal arteriyaya çevriləcək”, -deyə müəllif sonda vurğulayıb.
Bölmənin digər xəbərləri
