Əlcəzair qəzetində 28 May - Respublika Gününə həsr olunmuş məqalə dərc edilib
Qahirə, 27 may, AZƏRTAC
Əlcəzairin aparıcı “Əl Şuruq” qəzeti Azərbaycanın Əlcəzairdəki müvəqqəti işlər vəkili İlham Əliyevin 28 May - Respublika Gününə həsr olunmuş məqaləsini dərc edib.
AZƏRTAC xəbər verir ki, məqalədə xalqımızın hər il mayın 28-də Şərqdə ilk demokratik respublika - Azərbaycan Xalq Cümhuriyyətinin ildönümünü qeyd etdiyi diqqətə çatdırılır.
Müəllif qeyd edir ki, Azərbaycan 1991-ci ildə müstəqilliyini bərpa etdikdən sonra siyasi, iqtisadi və sosial sahələrdə böyük uğurlar əldə edib. Ölkəmizin təşəbbüsü və liderliyi ilə nəhəng transmilli enerji və kommunikasiya layihələri həyata keçirilib, işsizliyin səviyyəsi 56 faizdən 5 faizə düşüb. 2013-cü ildə Azərbaycanın ilk süni peyki kosmosa göndərilib. Bütün bu nailiyyətlər xalqımızın ümummilli lideri, dahi siyasətçi Heydər Əliyevin müəyyən etdiyi müdrik daxili və xarici siyasət kursu nəticəsində mümkün olub.
Ulu Öndərin İslam dünyası ilə əlaqələrə verdiyi əhəmiyyətdən bəhs edən müəllif yazır: “Heydər Əliyev Azərbaycanın İslam aləminin bir parçası olduğuna inanırdı və İslam Əməkdaşlıq Təşkilatı ilə əməkdaşlığa böyük diqqət yetirirdi. Onun 1994-cü ildə Kasablankada keçirilmiş İslam ölkələri Zirvə Görüşündə çıxışı bütün müsəlman aləminin diqqətini cəlb etmişdi. Dahi siyasətçi İslam dünyası ölkələrinin problemlərindən bəhs etmiş, onların arasında həmrəyliyin əhəmiyyətini vurğulamışdı. O, Azərbaycanın ərəb və İslam dövlətləri ilə siyasi, iqtisadi və mədəni əlaqələrinin inkişafı istiqamətində böyük səylər göstərmişdir”.
Məqalədə diqqətə çatdırılır ki, ulu öndər Heydər Əliyevin müdrik siyasətini uğurla davam etdirən Prezident İlham Əliyevin rəhbərliyi ilə mühüm nailiyyətlər əldə edilib. Məhz onun liderliyi ilə Azərbaycan Ordusu Ermənistanın işğal etdiyi ərazilərimizin azad edilməsi uğrunda aparılan 44 günlük Vətən müharibəsində Şanlı Zəfər qazanıb, BMT Təhlükəsizlik Şurasının məlum qətnamələrinin tələblərini yerinə yetirərək ərazi bütövlüyümüzü bərpa edib.
Müəllif işğalçı Ermənistanın ərazilərimizdə törətdiyi vəhşiliklər, o cümlədən dini, tarixi-mədəniyyət abidələrini, infrastruktur obyektlərini, binaları dağıtması, məzarlıqları və məbədləri viran qoyması, məscidlərdə donuz saxlaması haqqında məlumat verir. O əlavə edir ki, hazırda işğaldan azad olunmuş torpaqlarda geniş bərpa quruculuq işləri aparılır, məscidlər və İslam irsi abidələri yenidən inşa edilir.
Məqalədə təəssüflə qeyd olunur ki, Ermənistan və onun bəzi xarici havadarları Azərbaycanın Zəfərini həzm edə bilmir, ölkəmizə qarşı əsassız və yalanlarla dolu qarayaxma kampaniyasını davam etdirirlər.
Sonda vurğulanır ki, bu il Azərbaycan xalqı Respublika Gününü Qələbə əhval-ruhiyyəsi ilə, torpaqların işğaldan azad olunması və beynəlxalq miqyasda tanımış ərazilərin bərpa edilməsi şəraitində qeyd edir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
