Eldar Cəfərov və Anna Sajina Azərbaycanı Avropa rəqsləri üzrə dünya çempionatında təmsil edəcək
Bakı, 4 oktyabr, AZƏRTAC
Oktyabrın 28-də Kreml sarayında Avropa rəqsləri üzrə peşəkarlar arasında 2017-ci ilin dünya çempionatı keçiriləcək. Dünya standartlarının ən zərif cütlüyü - Eldar Cəfərov və Anna Sajina ölkəmizi bu yarışmada təmsil edəcək.
AZƏRTAC xəbər verir ki, turnir baş tərəfdaş olan “Qazprom”un (SC) və rəsmi tərəfdaş olan “NordStar” aviaşirkətinin dəstəyi ilə keçiriləcək. Çempionatın təşkilatçısı Rusiyanın Əməkdar İncəsənət Xadimi, Rusiya Rəqs İttifaqının prezidenti, Ümumdünya Rəqs İttifaqının fəxri vitse-prezidenti Stanislav Popovdur.
Azərbaycan duetinin son iki mövsümdəki nəticələrini - dünya üzrə nüfuzlu turnirlərin finalında müntəzəm iştirakını izləsək, görərik ki, irəliləyiş göz qabağındadır. Düzdür, keçən yay tərəf-müqabilin zədə alması səbəbindən cütlük yarışlarda fasilə götürmək məcburiyyətində qalıb. Bununla belə, E.Cəfərov və A.Sajina vaxtlarını hədər keçirməyib, yaxşı fiziki formada qalmaqdan ötrü mümkün olan hər şeyi ediblər.
Kremldə keçirilmiş əvvəlki turnirlər barədə təəssüratlarını bölüşən azərbaycanlı rəqqaslar qarşıdakı dünya çempionatına dair ümidlərindən də danışıblar.
“Kremldə keçirilən çempionatlar bizim üçün daim gözlənilən hadisədir. Orada həyəcanlı və bayram ab-havası hökm sürür. Əvvəlcə fürsətdən zövq alırsan, çünki o, həmişə unudulmaz olur. Kremldə olarkən uşaqlıq illərinin səyahəti yada düşür. Bu yer rəqqaslar üçün də məxsusidir. Buraya dünyanın ən yaxşı cütlükləri toplaşır. Hamı bir nəfər kimi yüksək səviyyədədir. Belə gözəl təşkil olunan turnirlər çox azdır. Bu, həmişə təmtəraqlı, gözəl musiqi və heyranedici meydançadır”, - deyə A.Sajina qeyd edib.
“Son vaxtlar biz bu rəqs meydançasında şou-proqramlarla da çox çıxış etmişik. Deyirlər, Kreml tamaşaçısı o qədər sadə də deyil. Bizim üçün isə əksinə. Biz rəqs edərkən tamaşaçı zalının coşqun, səmimi dəstəyini hiss edirik”, - deyə E.Cəfərov bildirib.
Onun sözlərinə görə, hər bir idmançı üçün başlıca məsələ özünün daha yaxşı nəticəsini göstərməkdir.
“Bizim üçün bu, finaldır. İkinci mühüm an budur ki, tamaşaçılara rəqs bayramı hədiyyə etmək, öz emosionallığını və hisslərini rəqs vasitəsilə çatdırmaq istəyirsən. Valideynlərimizin, dostlarımızın gəlib bizə azarkeşlik edə biləcəyi Rusiyada o qədər də çox turnir keçirilmir. Onların gəlişi isə bizə stimul verir və ruhlandırır”, - deyə E.Cəfərov əlavə edib.
Kreml turnirlərində rəqqasların ən çox sevdiyi canlı musiqi iki nadir kollektivin ifasında səslənəcək. Standart üzrə çempionatı Semyon Milşteynin caz orkestri müşayiət edəcək. Onların repertuarında ənənəyə uyğun olaraq çoxlu romans və mahnı olacaq. Latın Amerikası rəqsləri isə Georgi Muşeyevin “Yeddi külək” musiqi qrupunun ən gözəl ifaçılarının müşayiətilə təqdim ediləcək.
Rusiya Rəqs İttifaqının artıq neçə illərdir Kremldə keçirdiyi turnir planetin rəqqaslarının sevimli yarışlarından biridir. Rəqqasları buraya cəlb edən əla təşkilatçılıq, təkrarolunmaz bayram ab-havası, gözəl meydança, rəqs turnirləri üçün az təsadüf edilən canlı musiqi və xeyirxah tamaşaçı kütləsidir.
Dünya çempionatı keçirilən gün burada, həmçinin paralel olaraq Latın Amerika rəqsləri üzrə həvəskarlar arasında Kreml Kuboku da keçiriləcək. Bununla da Kreml sarayının banket zalında idman rəqsi sənətinin çoxçeşidliliyi ilə tanış olmaq, dünyanın ən adlı-sanlı idmançılarının ifasında bu növün klassikasından zövq almaq və latın rəqsinin bütün gözəlliyini və şövqünü hiss etmək mümkün olacaq.
Ümumiyyətlə, 7 turdan ibarət tədbirin 4 turu dünya çempionatı, 3 turu isə Kreml Kuboku çərçivəsində olacaq. Bundan əlavə, təşkilatçılar turlararası fasilələrdə tamaşaçıları çoxsaylı maraqlı əyləncələrlə sevindirəcəklər. Tədbirin əyləncə hissəsində müxtəlif xoreoqrafiya sənəti ustalarının iştirakı gözlənilir.
Bölmənin digər xəbərləri
